30 سائق «توك توك» يحاربون الغلاء بتسعيرة موحّدة: بـ2٫5 وتعالى بص

08:24 م | الجمعة 22 يونيو 2018

ما إن تم تحريك أسعار الوقود، وزادت أجرة وسائل المواصلات المختلفة، حتى اندلعت مشاجرات لا تنتهى بين المواطنين والسائقين، كل طرف يتربّص بالآخر. مواطن يشعر بالجشع والاستغلال، وسائق يرى أنه ضحية ويعانى من قله المكاسب. أما فى شارع «عز الدين عمر» بمنطقة الهرم، فالوضع بدا مختلفاً والصورة أكثر إشراقاً، بفضل مبادرة لسائقى الـ«توك توك» تتحدّى الغلاء.

30 سائقاً اجتمعوا على حب الوطن، ووضعوا تسعيرة ثابتة لأجرة الـ«توك توك»، استجابة لمبادرة «منطقتى بخير»، التى أطلقها مجموعة من شباب المنطقة، فى محاولة لاحتواء أزمة ارتفاع أجرة المواصلات، ومواجهة جشع السائقين، واستقروا على جنيهين ونصف لسعر التوصيلة.

{long_qoute_1}

يقول مدحت عبدالتواب، صاحب الفكرة: «مفيش حد بيستغنى عن التوك توك، علشان كده حبينا نوحد سعره»، موضحاً أنه منذ إطلاقه المبادرة فى نطاق المنطقة، رحّب عدد كبير من السائقين بالتضامن معه: «قبل ما ننفذ المبادرة كانت الأجرة ممكن توصل لـ5 جنيه، كل سواق بمزاجه، دلوقتى لصقنا ستيكر بالأجرة على مجموعة التكاتك المشاركة فى المبادرة، علشان تكون مميزة، والزباين تتعرف عليها». ولجذب عدد أكبر من السائقين للاشتراك فى المبادرة، يقوم «مدحت» بعمل دعاية للسائق على موقع التواصل الاجتماعى «فيس بوك»: «بنصوره ونشجعه على الخطوة اللى عملها، ونسيب رقم تليفونه علشان الناس تطلبه وهى راحة أى مشوار، وبكده الإقبال عليه بيزيد».

ينوى «مدحت» تعميم الفكرة، ويخطط لتطبيقها على سائقى الميكروباصات: «المبادرة هيكون اسمها (ابن المنطقة)، وهنخلى الأجرة جنيه ونص». راحة شديدة شعر بها شعبان حلمى، 45 عاماً، منذ أن انضم إلى المبادرة، لم يشعر بها مطلقاً على مدار عامين من العمل على الـ«توك توك»، حيث كان يومه لا يخلو من المشادات مع الزبائن: «الناس كانت بتتخانق معايا، ولما حدّدت الأجرة الربح زاد، والإقبال عليا كتر، والخناقات اختفت»، موضحاً أنه يعمل على الـ«توك توك» لزيادة دخله، ويساعده ابنه فى ذلك، ولم يكن يتحمّل شجار الزبائن. الحال نفسه شعر به رمضان مكرم، سائق «توك توك» فى منطقة الهرم، حيث إن زيادة الإقبال عليه عوضته انخفاض قيمة الأجرة: «تليفونى مش بيبطل رن». يتمنى «رمضان» ترخيص الـ«توك توك» الخاص به، وأن يحمل لوحة معدنية ويكون له رقم مسجل: «ممكن يتسرق أو يتعرض لحوادث كتير وماعرفش آخد حقى وأعوض خسايرى بسبب إنه مش مترخص. ياريت نتفادى كل ده».