شباب يهربون من التليفزيون إلى «الإنترنت»: «حرية أكبر وبنتحكم فى الإعلانات»

07:16 م | الخميس 21 يونيو 2018

يعد التحكم فى التعرض للإعلانات إحدى الميزات الكبرى التى دفعت بعض الشباب للجوء إلى مشاهدة البرامج عبر «اليوتيوب»، بسبب إمكانية «تخطى الإعلان»، على النقيض من التليفزيون الذى يعج بالإعلانات المطولة التى تستمر فى بعض الفضائيات لأكثر من 10 دقائق، فتضطر لمشاهدتها رغماً عنك وتخرجك من حالة التركيز فى فقرات البرامج أو أحداث المسلسلات.

«الإعلانات الكتير بتفصلنى من أحداث الفيلم أو المسلسل والنت بيبقى أحسن عشان ببقى مالكة وقتى وبقدر أشوف الفيلم أو البرنامج أو المسلسل وقت ما بكون فاضية»، هكذا قالت ندى محمد، مهندسة معمارية، مضيفة: «ممكن أعيد اللقطة أو أضطر أعمل حاجة ضرورية فأوقف اللقطة اللى بتفرج عليها أو أجرّى المشاهد زى ما أحب، وطبعاً الخاصية دى مش موجودة فى التليفزيون».

وبررت سارة ممتاز، 26 سنة، أسباب عزوفها عن مشاهدة التليفزيون منذ سنوات واتجاهها إلى «اليوتيوب»، بالقول: «مش كل حاجة بحبها وعايزة أشوفها بتبقى موجودة على التليفزيون فأنا كده مسيرة مش مخيرة، مثلاً أنا بحب جداً الكتب المسموعة على اليوتيوب، وبضغطة زر بقدر أوصلها بسهولة، ومن أهم الأسباب اللى بتخلينى أفضل اليوتيوب على التليفزيون إنى بقدر أسرع رتم الكلام وأنا بسمع الكتاب وده بيوفرلى وقت كبير وأقدر أسمع أكبر عدد من الكتب فى وقت قصير، ده غير إنى بحمل أى حاجة من اليوتيوب وأنا مشغلة الواى فاى، وأنزل مثلاً أو أسافر وأتفرج براحتى من غير نت، من الممكن أتفرج على التليفزيون فى حالات نادرة جداً زى مثلاً لما كنت فى الجامعة ماكنتش بتفرج عليه غير عشان أشوف الإعلانات بحكم دراستى أو لما بيكون فيه فيلم أجنبى مميز أو فيلم عربى قديم لكن المسلسلات العادية اللى بتتعرض كل يوم مش بشوفها غير على النت».

{long_qoute_1}

وتحدثت عن قائمة المفضلات التى تشاهدها على «اليوتيوب» قائلة: «بشترك فى كورسات أونلاين ده بالنسبة للدراسة، لكن من ناحية الترفيه بحب أتابع برنامج البلاتوه وسوبر ماما وبرامج تانية بتبقى مفيدة وبتقدم معلومات جديدة».

وتضيف منى عبدالحميد، ربة منزل، 35 سنة: «أنا بحب أتفرج على التليفزيون جداًً وبحس إنه بيعمل جو فى البيت والفرجة عليه لها طعمها الخاص والمميز، واتربينا عليه زمان وإحنا صغيرين وماكناش نعرف نت ولا غيره، بس بسبب انشغالى بشغل البيت وجوزى وأطفالى مابقاش عندى وقت أقعد قدام التليفزيون، وبقى يفوتنى برامج ومسلسلات كتير، خصوصاً فى رمضان، لأن الوقت بيبقى قصير وكم المسلسلات والبرامج اللى بتتعرض كتير جداًً فبنتظر لما أخلص اللى ورايا وأبدأ أشوف الحاجات اللى بتابعها على اليوتيوب».