بيتر ميمي يفسر للجمهور الأخطاء الإخراجية بمسلسل "كلبش 2"

01:16 م | الخميس 24 مايو 2018

أجاب المخرج بيتر ميمي على كل الانتقادات التي وجهت له بسبب بعض الأخطاء الإخراجية التي وقع فيها خلال الحلقات الأولى من مسلسل "كلبش 2" للفنان أمير كرارة.

وكتب "ميمي"، عبر حسابه الشخصي على موقع التواصل الاجتماعي "فيس بوك": "أنا عادة مش برد على تعليقات لكن بقراها وباخدها باهتمام للتطور، وفعلا الحمدلله وبفضله التطور موجود من عمل لأخر ومن سنة لأخرى، لكن حبيت أرد على بعض التعليقات؛ لأن فعلًا نسبة مشاهدة "كلبش" أصبحت فوق المتوقع لدرجة أكبر بكتير كمان من رمضان السابق".

وأضاف: "١- عاكف أبوالعز بيتحدث بلهجة صعيدية وأبوه بلهجة بدوية وده باين من أول حلقة (متبقاش صعيدي زي اللي خلفتك)، وهنعرف مين اللي خلفته وليه مش أبوه اللي رباه في الحلقة 15، ومعانا مصحح لهجة بدوي ومصحح لهجة صعيدي للدقة، 2- ضابط الأمن الوطني ممكن يكون بدقن وشعر طويل عادى جدًا وأنا راجعت ده بنفسي قبل التصوير من بعض الضباط وقيادات الداخلية وإحنا بناخد التصاريح للتصوير في أماكن حقيقية وحية مثل سجن طرة ومستشفى الشرطة، 3- وضعية مسك الآلي ممكن تكون من الماسورة وأثناء الاشتباك ممكن تكون من الخزنة لسرعة تغيير الخزنة وكان معانا عميد من العمليات الخاصة أثناء تصوير المشاهد ديه والراجل كان بيدي المحاضرة ديه قدامي للضباط، مع العلم أن المدرعات والمركبات والجنود والضباط هم حقيقيين من العمليات الخاصة".

وأوضح: "4- تراك جيم أوف ثرونس اللى فى أول حلقة ده غلطة غير مقصودة؛ لأن إحنا فى المونتاج بنحط تراكات عالمية وبعدين بنشيلها فى الميكساج ده بيحصل فى كل الشغل والحلقة الأولى كان فيها 13 تراك من جيم أوف ثرونس، وتم تغييرهم بموسيقى المسلسل ونسيو واحد سهوًا، وبعتذر على الخطأ غير المقصود برده لأنى طلبت تغييرات فى الحلقة أكتر من مرة كل شوية بعدل فيها وإحنا عاملين موسيقى للمسلسل مصر كلها عارفاها من السنة اللى فاتت، 5- ابن سليم الأنصارى بيرضع كراوية مع أنه المفروض بيرضع ريد بول عادى، 6- حلقة 8 أنا عيدت المشهد لما روجينا قالت (عمر) بدل (حسام) سهوًا والمونتير من ضيق الوقت حط الشوت الغلط سهوًا".

وتابع حديثه، "أنا بشكر الناس اللى متابعة المسلسل بدقة شديدة وبشكر فريق العمل النجوم والإنتاج والمونتاج والتأليف والميكساج والموسيقى والديكور ومساعدين الإخراج علشان إحنا بسببكم بنافس على أعلى مشاهدة للسنة الثانية على التوالي بجزء تاني وده مبيحصلش و"كلبش 2" بما فيه من أكشن وضخامة إنتاجية هيكون ولا حاجة بالنسبة للمشروع اللي تم تحديده للعام المقبل "رمضان 2019" واللي هيكون الأضخم عربيًا وبيضم مجموعة من نجوم عالميين من إنتاج شركة سينيرجى إن شاءلله.. أدعولنا بقى إحنا بنحاول نطور الصناعة وانتظرو حرب كرموز فى مصر والخليج وأوروبا: إيطاليا - ألمانيا- لندن".