ندا موسى: خسيت 12 كيلو في 3 أشهر عشان "بالحجم العائلي"

01:52 م | الأربعاء 23 مايو 2018

أعربت الفنانة الشابة ندا موسى، عن سعادتها بالمشاركة مع النجم الكبير يحيى الفخراني في مسلسل "بالحجم العائلي"، قائلة: "تجربة ممتعة جدا وببقى سعيدة في كل مشهد بيجمعني بدكتور يحيى، لأنه ممثل قدير، واللي بيشتغل قدامه بيحس إن عينه نفسها بتتكلم وبياخدك لعالم تاني خالص، ويجبرك إنك تقدم أحسن ما عندك في المشهد".

وأضافت "ندا"، لـ"الوطن"، "تشرفت أيضًا بالعمل مع المخرجة هالة خليل، والكاتب محمد رجاء السيناريست الشاطر جدا وكل أعماله فيها (فلفل وشطة)، لأنه عارف بيعمل إيه وبيكتب إيه".

وعن الاستعدادات التي سبقت مشاركتها في المسلسل، أوضحت "ندا": "أنا كنت عملت مسلسل (حكاية بنات)، وكان مطلوب إن وزني يبقى زايد، وفي مسلسل (بالحجم العائلي) أنا بجسد دور مدربة زومبا يعني لازم يبقى جسمي رشيق جدا، عشان كدة خسيت 12 كيلو في 3 أشهر، ودلوقتي بحاول أحافظ على وزني رغم إغراءات الكنافة والحلويات من يوم ما بدأ رمضان".

وتابعت "ندا": "قضينا 3 أشهر مع بعض بنصور المسلسل في مرسى علم وكنا بعيد عن أهالينا، وده خلانا كلنا عائلة واحدة وأصحاب بجد، دلوقتي تقريبا فاضلي 20% بس من المشاهد بتاعتي، وبصور كل يوم في رمضان".

واستكملت النجمة الشابة: "بعمل كل اللي عليا عشان أقدم حاجة تسيب علامة كويسة عند الجمهور، ويا رب أكون قد المسؤولية الكبيرة دي في التمثيل مع نجم كبير بحجم يحيى الفخراني خصوصا إن هو اللي اختارني للدور ده".