بريد الوطن| اللى بينّا
بريد الوطن| اللى بينّا
اللى بينا أكبر من حضن شيخ لقسيس
اللى بينا غالى ولا هيبقى رخيص
بينا حضن وطن مدفينا
وعشرة زمن باقية فينا
بينا ليالى وذكريات
ومشاركة ف أفراح وآهات
رغيف بنقسمه نصين
ومولد العدرا والحسين
اللى بينا أكبر من صليب وهلال
اللى بينا أرسخ من الجبال
بينا غرام ممزوج باحترام
مايوصفهمش أى كلام
بينا أرض ترابها مروى بدمنا
وأماكن ف حضنها بتضمنا
اللى بينا مش كلام أغانى
دا واحد بيموت علشان التانى
بنا دم واحد ف العروق
وحب مدوب الفروق
اللى بينا ف الشدة بيبان
تملى واحد ولو الخطر بركان
بينا حب الخلق بيه تقتدى
ف قلبى كنيسته وف قلبه مسجدى
بينا تاريخ ع جدران قلوبنا منقوش
ياما حاولوا يمحوه وما قدروش
مصطفى سيد عبدالسلام - الدلاتون - منوفية
يتشرف باب "نبض الشارع" باستقبال مشاركاتكم المتميزة للنشر، دون أي محاذير رقابية أو سياسية، آملين أن يجد فيه كل صاحب رأي أو موهبة متنفساً له تحمل صوته للملايين.. "الوطن" تتلقى مقالاتكم ومشاركاتكم على عنوان البريد التالي
bareed.elwatan@elwatannews.com
