راندا البحيري عن سمير غانم: "بيضحكني بشكل مش طبيعي"
راندا البحيري عن سمير غانم: "بيضحكني بشكل مش طبيعي"
نشرت الفنانة راندا البحيرى صورة من كواليس مسلسل "عوالم خفية" للزعيم عادل إمام وهو يحتضن سمير غانم عبر حسابها الشخصي على موقع تبادل الصور والفيديوهات "انستجرام".
وعلقت على الصورة قائلة، "الصورة دي بحبها أوي أوي أوي فعلا أستاذ سمير غانم الكل بيحبه بشكل رهيب.. محدش اختلف عليه.. بيضحكني بشكل مش طبيعي. أكتر واحد في جيله ملهوش علاقه بأي إشاعات ولا خلافات ولا مصالح.. الراجل ده عايش علشان يتبسط ويستمتع ويضحَّك اللي حواليه و بس.. مشالش هم الدنيا ف الدنيا مشيلتهوش هموم".
وأضافت راندا البحيري، لما حد بيسأله في برنامج عن رأيه في حاجه أو حد، عمره ما بيقول رأيه علشان مبيحبش حد يزعل منه، مبيقولش إلا كلام كويس عن كل الناس، علشان هو فعلا بيحب كل الناس، مبينقدش زملائه ولا بيسخر منهم، بيدي لكل الناس قيمتهم و بيرحب بأي حد سواء صغير أو كبير.
وتابعت راندا البحيري: "عن تجربة شخصية هو واحد من أكتر الناس المتواضعه في الدنيا، ومحب للناس فعلًا، ومحب للحياة، نزلت خرجت معاه، وروحنا السينما عادي جدًا سنة 2006 كذا مرة، كان بيخرج معايا أنا وإيمي بمنتهى التواضع، بيسلم ويتكلم مع أي حد في الشارع ويرغي ويفتح مواضيع ويرمي أفيهات طول الوقت، كل اللي حواليه بيحبوه، وأكبر دليل على كلامي، ضحكه #الاستاذ #عادل_إمام في الصورة دي، عمري ما شوفتها بالشكل ده".
