مناشدة ملك عبر "فيسبوك": "محمد مش مشوه.. شاركوا معايا في علاجه"

04:21 م | الأحد 11 فبراير 2018

نشرت فتاة تدعى ملك هشام، على حسابها بموقع التواصل الاجتماعي "فيسبوك" صورة لها مع أحد الأشخاص الذين ينفر منهم الجميع، بسبب تشوه وجهه نتيجة إصابته بمرض غدة وهو صغير، ونتيجة الإصابة لم يجد له عملًا سوى "الشحاتة".

وعرضت "هشام" صور لها مع "محمد" معلقة عليها: "بعد ما كنت نازلة من البيت متخانقة، قال عشان أبويا مش راضي يغير العربية.. شوفت القمر ده كنت هعمل زي أي حد وأطلع اللي فيه النصيب وأمشي، لاقيت نفسي بقعد جمبه وبنتكلم، وبعد ما روحنا أكلنا واتظبطنا حكالي، محمد كان عنده الغده وهو صغير وراح لدكتور منه لله يعمله عمليه، موتله العصب السابع.

وتابعت هشام في منشورها، "محمد قالي أنا مش عايز أشحت بس كل ما أروح مكان بيتريقوا عليا ويضربوني، وآخر مرة واحدة حامل في العياده اللي هو كان فيها شتمته وقرفت منه".

وأضافت: "أنا فعلا مشوفتش أحلى من ضحكته ولا كلامه ليا وهو بيقولي متخليش حاجه تزعلك، ربنا بيدي كل واحد على قد طاقته وأنه صابر على مرضه؛ بس نفسه يخف عشان يصرف على أخواته وأمه من غير ما حد يتريق عليه، محمد محتاج عمليه زرع عصب هتتكلف كتير، وأنا حقيقي أضعف من إني أعمل حاجه لوحدي".

وتابعت: "فبعد إذنكوا اللي يعرف دكتور أو يقدر يساعد يبلغني واللي مش هيقدر يساعد يعمل شير للبوست لعل وعسى نبقى سبب في أنه يخف، محمد قاعد قدام فودافون اللي في أول عباس، روحوا فرحوه بكلمه عشان هو جميل أوي".

واختتمت: "ربنا يجازي كل اللي كلموني، وعشان فعلا مش عارفه أرد من كتر الرسائل، أنا بأمر الله هفتح حساب بكرة باسم محمد في المستشفى اللي هتتكفل بالعملية عشان اللي بيسأل يدفع لمين وربنا يباركلكوا يارب".

وتفاعل عدد كبير من رواد مواقع التواصل الاجتماعي مع دعوة ملك لمساعدة الشاب محمد، حيث حصل المنشور على أكثر من 50 ألف إعجاب و35 ألف مشاركة له، وانهالت التعليقات ما بين الدعاء له، والسؤال على كيفيه الوصول إليه لمساعدته في العلاج.