«دلع كرشك» شعار المتمردين على «الدايت»: إحنا شباب «بيحب الأكل»

07:51 م | الجمعة 05 يناير 2018

«الكرش اللى على حق ميقولش للأكل لأ».. شعار رفعه مجموعة من الشباب أصحاب الوزن الزائد، لتشجيع الآخرين على تناول الطعام بحرية كما يشاءون، دون اتباع أنظمة غذائية هدفها إنقاص الوزن، يرى الشباب أن تناول الطعام متعة كبيرة، لذلك يقصدون المطاعم على اختلافها بدءاً من الأكل الشعبى وحتى الوجبات الغربية لتناول الوجبات الشهية.

منذ 3 شهور، دشن على مجدى، الذى يبلغ وزنه 120 كيلو، صفحة على الفيس بوك، تحت اسم «ساعة لبطنك»، يشجع من خلالها على تناول الطعام، وتقوم ببث الفيديوهات الخاصة بتناول وجباتهم داخل المطاعم المختلفة، محاولين بذلك كسر روتين أنظمة الغذاء التى يرونها تسبب الاكتئاب والحزن: «معظم اللى باشوفه بيتبع نظام غذائى علشان الدايت، بيرجعوا ياكلوا بشراهة عشان بيجيلهم اكتئاب وبحسهم دايماً زعلانين ومكتئبين وقرفانين من الدنيا كلها».

ينصح الآخرين بتناول ما يحلو لهم من طعام، لكن باعتدال: «الأكل متعتى الوحيدة ومتعة الناس كلها تقريباً، واللى عايز تفرحه أكله، بس مش معناه كده ناكل بافترى لدرجة إننا نمرض».

يجمع «على» أصدقاءه الـ3 يومياً، ويقومون بزيارة المطاعم: «كلهم رفيعين إلا أنا وزنى زايد شوية لكن مش باين عليا عشان طويل، ومع ذلك بمارس الرياضة، لكن باكل لأن الأكل فرحة».

ينظم الشباب مسابقة لتناول أكبر كميات من الطعام بأسرع وقت ممكن.