من أين تأتى السعادة لهؤلاء؟
من أكتر الحاجات المؤثرة في حياتنا عموما هي self -esteem "تقديرنا لذاتنا".
أحيانا بتلاقى ناس سعادتهم بتيجى من أشياء بسيطة وعادية للغاية، زى الإنجاز أو النجاح أو التأثير.. وناس تانية مهما نجحت أو عملت إحساسها بالتقصير والفشل والإحباط مُتصدر حياتهم.، والسبب في ده هو "كم تقدير الذات عندهم".
بيقولوا بقى إن في 3 عوامل نفسية مؤثرة:
1) ?what your same sex parent did
يعنى اللى حققه والدك أو والدتك من نفس النوع، "إزاى بتقارن بينك وبين والدك لو إنت ولد، وبين والدتك لو إنتى بنت، لو كان إنجازك أكبر أو أقل منهم".
الناس اللى بتتفوق على والديهم بيبقى عندهم تقدير ذات أعلى.. وخصوصا الناس اللي بتخرج من بيئة بسيطة مش غنية قوى.
على سبيل المثال إنك تركب عربية قديمة وبايظة وتتجول ف مدينة فقيرة.. هيكون في عنيك وكأنك أمير لو قارنت بينك وبين مثلا البيئة البسيطة اللى نشأت فيها.
2) ?what your peer group is up to you
يعنى اللى بيوصله ليك زمايلك، عمرنا ما بنحس بالحسد تجاه أى حد كويس، إلا إذا كان زميل لينا في وقت معين أو اتربى معانا أو درسنا سوا، وقريبين مننا، دول أكتر ناس بيأثروا فينا..نظرتك لزمايلك اللى بينجحوا عموما، وخصوصا اللى علاقتك بيهم كانت قوية، وتصرفاتهم معاك عاملة إزاى، وتفسيرك ليها.
3) ?what kind of love you received in childhood
يعنى إيه نوع الحب اللى حصلت عليه وإنت صُغير؟
هل هو حب مشروط؟ يعنى عشان تحس بسعادة والديك أو حب مامتك أو اهتمام والدك كان لازم تنجح وتجيب درجات.. وإزاى ربطوا إن بالنجاح هتاخد حب وحنان، غيركده هيبقى في أزمة كبيرة.
بعض الآباء والأمهات بيقدموا حنان مشروط، وكل اللى يهمهم هو درجاتك في المدرسة وبس..ولذلك بتكبر تلاقى نفسك ناجح.. بس أى نجاح هيقدر يغير كراهيتك لنفسك وعدم تقديرك لذاتك؟
ولكن الناس اللى أخدوا حب غير مشروط وهم صُغيرين هيكونوا بخير ديما بأبسط الأشياء، لأنه مش مطلوب منهم يبذلوا مجهود "بضغط من الغير" عشان يكونوا ناجحين أو عشان يبهروا حد.. هم في الغالب بينجحوا بسبب "دافع داخلى منهم".. ولذلك بتلاقى تقديرهم لذاتهم عالى جدا..
#الخلاصة_مهمة
عشان كده ممكن تعمل حاجة جميلة جدا في مجال ما، لكن مقارنتك بوالدك، أو نظرتك لزميلك اللى بقى رئيس في مكان ما وإنت لسه عادى، أو عدم دافعيتك من نفسك للنجاح، تخليك تشوف نفسك شخص عادى جدا ومتحسش بسعادة من اللى عملته.
عموما رضاك عن نفسك مش بيجى من إنك تنجح وتحقق حاجات وألخ..، لكن بيجى من تصالحك مع نفسك وبتأثير من العوامل اللى فاتت دى ونظرتك لنفسك إنت، مش نظرة الناس إليك.
