"الشبورة" وقف حال وخصومات على التأخير.. وإيمان: "ملحقتش الامتحان"

12:58 م | الثلاثاء 05 ديسمبر 2017

ساعات طويلة دون حركة، وتكدس مروري لا ينتهي، غلق طرق رئيسية، و"وقف حال" مشاكل واجهها الكثيرين في أثناء قيادة سيارتهم اليوم، كان البطل الأول فيها "الشبورة"، الأزمة التي اضطر المواطنون قبولها، بوقف حالهم وأشغالهم.

"الشبورة مبهدلة الجو، مفيش سفر وأنا المفروض عندي امتحان في جامعتي في إسكندرية"، "اتخصم ليا في الشغل بسبب الشبورة اللي أخرتني 3 ساعات عن شغلي"، تعليقات عديدة كتبها الكثيرين على صفحاتهم الشخصية بموقع التواصل الاجتماعي "فيس بوك"، تعبيرا عن غضبهم، بسبب الشبورة التي حجبت الرؤية على الطرق.

إيمان محمد، طالبة بالفرقة الرابعة بجامعة الإسكندرية، وواحدة ممن عانوا بسبب الشبورة المائية، التي منعتها من حضور امتحانها: "أنا عشان آخر سنة ليا في كلية تجارة عندي مشروع وكمان امتحانات على طول، ودي بتبقى مهمة، وأنا الفترة دي بروح كل يوم من القاهرة لإسكندرية وبنزل من بدري عشان الحق مواعيد الامتحانات، والنهاردة معرفتش أسافر لأن الطريق كان مقفول بسبب الشبورة عشان طبعاً ميحصلش حوادث وراح عليا الامتحان".

وقف حال "إيمان" الذي تعرضت له، لم يختلف كثيرا عن "سالم محمود"، مهندس معماري: "يومي اضرب، أنا ساكن في التجمع وشغلي في أكتوبر، روحت متأخر عن موقع شغلي وللأسف اتخصم ليا عشان موصلتش في ميعادي، ويومي النهاردة كان مهم جداً، بس مكنش موفق بسبب وقفة الصبح اللي قعدت فيها أكتر من ساعتين والطريق كان مقفول تماماً".