تامر حبيب عن "الخطيب": مبروك على الأهلي رئيس مناسب ومشرف وخلوق

علق الكاتب والسيناريست تامر حبيب، على فوز الكابتن محمود الخطيب برئاسة النادي الأهلي، وقائمته أول أمس، عبر حسابه على "إنستجرام"، قائلا: "أنا عمري ما كان ليا في الكورة ولا بفهم فيها بالمرة، بس اخترت من صغري لما يسألوني أنا اهلاوي ولا زملكاوي، إني أكون أهلاوي، وعشان أسباب مالهاش أي علاقة بالكورة".

وتابع حبيب: "أولا لأن صالح سليم بطل فيلم الشموع السوداء أهلاوي، ثانيا لأني كنت بروح النادي الأهلي زمان مع أهلي وأصحابي اللي كانوا بيلعبوا كورة هناك، ثالثا لأني بحب اللون الأحمر، رابعا لأن الأهلي طول عمره كان بيكسب أكتر من الزمالك، وعمري ما كنت أعرف من لعيبة الكورة إلا اللي مثلوا في السينما أو عملوا إعلانات أو اتجوزوا فنانات".

وأضاف السيناريست: "عمري في حياتي ما شفت لاعب كرة وحبيت أتصور معاه ولا أفضل مراقبه ومنصت ليه في أي حاجة بيقولها، حتى لو بيتكلم في الكورة اللي أنا ثور لاهي في برسيمه فيها، ولا عمري كنت سعيد ومبهور بلاعب كرة إلا أمام هذا الرجل، طول عمري من صغري إلى الآن بفرح وأنا بشوفه في أي حاجة".

وزاد حبيب: "بكيت في ماتش اعتزاله وهو بيقول (ألف شكر)، عمري ما سمعت حد عرفه وأتكلم عنه غير بحميد الكلام ووصفه بأنبل الصفات، محمود الخطيب مش نجم كورة، محمود الخطيب نجم في كل حاجة، مبروك للنادي الأهلي رئيسه المناسب، المشرف، الخلوق".

• الكابتن محمود الخطيب
• اللون الأحمر
• تامر حبيب
• صالح سليم
• لاعب كرة
• الكابتن محمود الخطيب
• اللون الأحمر
• تامر حبيب
• صالح سليم
• لاعب كرة