بالصور| ملك الورق عمل من «الكوتشينة» بورتوريه صلاح.. «جوكر المونديال»
بالصور| ملك الورق عمل من «الكوتشينة» بورتوريه صلاح.. «جوكر المونديال»
حبه الشديد لمهاجم المنتخب الوطني محمد صلاح جعله يخرج ما يخفيه من إبداع عقب تأهل المنتخب المصري لكأس العالم 2018 في روسيا. فعلى طريقته الخاصة أعد "بورتريه" رسم فيه "صلاح" بورق الكوتشينة بمهارة عالية، ليصبح بهذه الرسمة أول راسم بورتريه بالكوتشينة على مستوى العالم، إنه "أحمد رفاعي"، طالب كلية الحقوق بجامعة طنطا، والملقب بـ"ملك الكوتشينة".
اعتاد "الرفاعي" عمل المجسمات الهندسية من ورق الكوتشينة إلا أنه هذه المرة فكر أن يبتكر شكلًا جديدًا من هذا الفن، وهو رسم البورتريه بالكوتشينة تطويرًا لأعماله: "الفكرة جاتلي عن طريق التجديد والتنوع علشان الناس متملش مني ففكرت إني أغير فكرتهم المتمثلة فإني برسم مجسمات هندسية بورق الكوتشينة دايمًا وقولت أغير وأعمل البورتريه، لأن عمرهم ما كان هييجي على بالهم أني أعمل حاجة غير المجسمات فبالتالي هي كانت فكرة جديدة".
وجد "ملك الكوتشينة"، أنه بعد صعود مصر لكأس العالم بتألق النجم محمد صلاح لم يعد هناك وقت لتأجيل تنفيذه لفكرة البورتريه التي كان يريد أن يهديه بها منذ فترة: "أنا كنت مخبي فكرة البورتريه بالكوتشينة دي لمحمد صلاح من فترة لأنه رمز للنجاح، بس مكنتش هعملها دلوقتي لكن بعد اللي هو عمله فى ماتش مصر ده أنا مقدرتش أخبي الفكرة أكتر من كده وحسيت إن هو ده الوقت المناسب إني أشكره فيه على اللي هو عمله".
رغم صعوبة رسم البورتريه بالكوتشينة إلا أن عشق الشاب العشريني لـ"صلاح" جعله أكثر إصرارًا على تنفيذ الفكرة، حيث استخدم 2000 ورقة من الكوتشينة، والتي كان يثبتها بدون قص أولصق، مما استغرق منه 4 ساعات: "الموضوع كان صعب بالنسبالي لأني عملت البورتريه دون قص ولصق، ودي كانت أول فكره لرسم البورتريه بالكوتشينة على مستوى العالم محدش عملها غيري من قبل، فحبيت أهديها لمحمد صلاح لكنه يستاهل أكتر من كده".
يأمل"رفاعي" أن يلتقي نجم المنتخب محمد صلاح، المحترف في نادي ليفربول الإنجليزي، وأن يتحدث إليه حتى يكتسب منه أسرار تألقه ونجاحه: "محمد صلاح بالنسبالي أكبر من إنه جاب جولين وأكبر من أنه سبب في التأهل لكأس العالم هو بالنسبالي أكبر من أي حاجة لإني بحب شخصيته المتمثلة في العزيمة والإصرار على النجاح بعيدا عن أي حاجة، وبتمنى إني أقابله في يوم من الأيام واتكلم معاه وأعرف منه أسرار بدايته واتعلم منه إزاى أبني حياتي، وبتمنى إن البورتريه يعجبه رغم إنه حاجة قليلة وهو يستاهل أكتر من كده".
