خبير يستخدم «التوم والبصل» فى التربية: اطلبوا العلم ولو فى المطبخ

08:15 م | الأحد 24 سبتمبر 2017

دَمج بين طرق التربية المختلفة والطبخ فأعد مائدة مفاهيم تربوية على رأسها الثوم والبصل، «توم آند بصل»، طريقة غريبة ابتكرها مينا عادل، خبير تنمية مهارات التربية، لتسهل على الأمهات تربية الأطفال بطريقة صحيحة، حيث قام بربط الواقع الذى نعيشه بالعلم الذى يقدمه، فطيلة سنين عمله العشرين وهو يواجه مشكلة فى محاضراته التى يقدمها للسيدات من أولياء الأمور وهى عدم فاعلية تطبيق القواعد السليمة لتربية الطفل بسبب النسيان والجمود: «حاولت اربط العلم بالطبخ، والتوم والبصل أكتر حاجتين الستات بتستعملهم يومياً وبيفتكروهم.. كل حرف من الجملة له دلالة معينة وبيشرح أسلوب معين من أساليب التربية».

«تشجيع، ود، مرونة ومحبة، بصورة واقعية، صبر، لوم» هى المفاهيم التربوية للأطفال التى حرص «مينا» على تجميعها تحت مسمى استراتيجية «توم آند بصل»: «الستات المصرية أكتر حاجة بتنجح معاهم لما تربط ليهم أى حاجة بالأكل.. فيه ستات كتير بتكلمنى إن الاستراتيجية ناجحة جداً دايماً بيفتكروا وهما بيطبخوا إنهم لازم يحفزوا أولادهم ويصبروا عليهم»، حيث وصف «مينا» أن التعامل بشدة مع الأطفال عادة ما يأتى بنتائج عكسية: «فيه أمهات كتيرة بتعند مع أطفالهم وده مش صح.. الطفل بيكون محتاج دايماً مرونة فى التعامل ومش أقعد ألومه طول الوقت».

ساعتان فقط هما مدة المحاضرة التى يقوم «مينا» بتقديمها للأمهات: «دايماً بركز مع الأمهات اللى أطفالهم فى سن أولى ابتدائى، ودايماً بنصحهم بالصبر على أطفالهم وإنهم يحرصوا على إنهم يحكوا لهم قصة قبل النوم اللى تكاد تكون اختفت».