خروف العيد
- يا فتاح يا عليم بالحال
ارزق سيد حفنة مال
- مستكة عدي اليوم على خير
لسه أنا عندي شغل كتير
- يوه يا سي سيد ده أنا بدعي لك
أول ما أصحي وقبل ما أنام
- سيد رد وقال: يا سلااااام!
أم عيالي هاتي م الآخر
أصل أنا عارفك
إيه طلباتك؟
- ردت مستكة:عايزة خروف
- طيب هاتي من المصروف!
- أحنا هنسخر!
- أمال نكفر؟
- ليه ياسي سيد نفسي أضحي
يبقى كفرت
ولّا أنا يعني قليلة عندك واستكترت
- وأنا من إمتي كنت بخيل
بس الهم عليا تقيل
عمري ما أمْكن أعمل حاجة واستخسرت
- طب ما سنية جالها خروف
وبكره عليّة يجي لها خروف
اطلع بص من البلكونة وإنت تشوف
- قولي كده بقى باصة لغيرك
- إنت بخيل
- طيب شكرا كتر خيرك
"مستكة ليه عكننتي عليه
جوزك طيب حاجي عليه
مالنا بغيرنا
سيبي السيد يمد لحافه
على قد ما توصل رجليه"
