7 حرائق تدمر شقق 3 أشقاء بالدقهلية.. ومعالج روحاني: هطرد الجن بالميّة

01:17 م | الأحد 20 أغسطس 2017

لم يجد أهالي قرية منشية عبدالقادر "التخشيبة"، في مركز بلقاس بالدقهلية، سوى "معالج روحاني" يدعى ياسر عبدالعظيم، لبيان سبب 7 حرائق متتالية، اشتعلت في منزل 3 أشقاء وقضت عليها تماما، بينهم شقيق لم يمر على زواجه سوى 7 أشهر.

"الشقق اللي مليانة أجهزة حديثة ومفروشة أحسن فرش بقت كوم تراب".. بهذه الجملة، بدأ باسم هلال محمود (28 عاما)، عامل، حديثه لـ"الوطن": "اتجوزت من 7 شهور، وبعد رمضان بدأت النار تمسك في مناشر الغسيل، وبعدها الستاير، وكل مرة نطفيها، لحد ما الشقة كلها اتحرقت، وبين كل حريقة وحريقة يا دوب أسبوع".

بعد نحو 8 أيام من احتراق ستائر شقة باسم، أغلقت زوجته شقتها، ونزلت لزيارة زوجة شقيق زوجها، يقول باسم: "لما طلعت لقيت نار رهيبة لونها أسود ماسكة في الشقة، حاولنا نطفيها بس معرفناش، كل حاجة اتحرقت، الفلوس والهدوم، ومبقيناش قادرين نوفر احتياجاتنا اليومي، منعرفش سبب النار ولا مصدرها، واضطرينا نلجأ للشيوخ عشان نشوف إيه الحكاية، وعملنا محاضر بكل شقة، وبعتنا فاكسات لمدير الأمن ومكتب المحافظ عشان ينجدونا".

بسام هلال محمد، (31 عاما)، سائق، وشقيق باسم، وأحد الثلاثة الذين احترقت شققهم بالكامل، يقول: "الأدلة الجنائية معرفتش سبب الحريق، ودلوقتي أنا بدور على شقة إيجار جديد بعيد عن بيتنا، أخاف لو نمت فيها الحريق تقوم تاني".

"الحريق بدأ في مرتبة، وبعدها اتنقل لباقي الشقة، كانت بتبدأ في الستائر الأول، وأكتر من 20 مرة مسكت في حبل الغسيل".. قال بسام، موضحا أنه ينام حاليا في شقة والده بالدور الأرضي في المنزل.

هلال محمود، والد الأشقاء الثلاثة، وقف مذهولا مما حدث لأبنائه، وقال هو يسند رأسه بيده: "حياة ولادي اتدمرت من الحرايق الكتير".

تلاوة آيات من القرآن الكريم، ورش مياه مقروء عليها قرآن في أركان الحجرات، ورش ملح مختلط بزهرة في الشقق المحترقة، كان ما فعله المعالج الروحاني للأشقاء الثلاثة، وطلب منهم تكرار الأمر لمدة أسبوع، لعدم تكرار الحرائق مرة أخرى، يقول: "اللي بنعمله كله من الشرع والدين، وبنستخدم ملح وميّة وزهرة عشان نطرد الجن الموجود في المكان، والطريقة دي استخدمناها في حرائق ميت الكرماء، وحرائق كفرالشيخ، والموضوع نجح والأمور بقت تمام دلوقتي".