«أوطة» يرحب بغير القادرين: الأكل كتير.. خد اللى عايزه

09:12 م | الاثنين 31 يوليو 2017

إذا كنت عابر سبيل واشتد عليك الجوع فجأة، ولا تملك الأموال لشراء الطعام، يمكنك الذهاب إلى شارع أحمد ماهر بمدينة المنصورة، والدخول إلى مطعم «أوطة» لتجد فى انتظارك وجبات مجانية ومتنوعة أعدها المطعم خصيصاً لغير القادرين.

تعرض أحمد البحراوى، 35 عاماً، صاحب المحل إلى موقف مشابه عندما فقد أمواله بالقاهرة، منذ عام ونصف العام، وحاصره الجوع واضطر حينها إلى السفر رغم الجوع الذى يقرصه، ومنذ ذلك الحين تعهد أن يقدم الطعام مجاناً، حتى يخفف عن الفقراء آلام الجوع: «حاسس بكل واحد جعان عشان كده بابى هيفضل مفتوح لأى حد جعان ومعهوش فلوس».

يتعامل المطعم مع غير القادرين كأنهم زبائن ويقدم لهم خدمة كتلك التى يحصل عليها من دفعوا حسابهم دون تفرقة: «بناخد الطلبات منهم وكل اللى نفسهم فيه ياكلوه ولو طلبوا تانى لحد ما يشبعوا وما بينا وبين بعضنا محدش بيقوم يحاسبهم أبداً ياخدوا واجبهم ويمشوا»، بحسب «أحمد»، مؤكداً أن المطعم يفرق بين عابرى السبيل الذين فقدوا أموالهم والمتسولين: «بس منقدرش نقفل الباب فى وش أى حد لكن بنديهم أى ساندويتش.. عشان دول بيجولنا كل شوية».

المبادرة التى يقوم بها «أوطة» جعلت المتبرعين يقفون على أبواب المطعم للمشاركة بأموالهم فى الوجبات المقدمة: «بقى فيه ناس تيجى تقول عايزين نساهم فى الأكل اللى بيطلع للناس الغلابة، فعملنا صندوق وبنشيل فيه فلوسهم على جنب»، رغم الوجبات المجانية التى يقدمها المطعم يومياً فإنه لم يتعرض يوماً للخسارة: «الـ100 جنيه اللى بتجيلى بتبقى كلها بركة.. عشان جاية من عمل الخير».