حالياً فى الأسواق: بيض البط بديل موفر لارتفاع الأسعار

07:39 م | السبت 29 يوليو 2017

بعد ارتفاع أسعار البيض، ظهر اتجاه لاستخدام بيض البط، حيث تتراوح أسعاره بين 150 و180 قرشاً للبيضة الواحدة، لكن حجمه الأكبر يساعد على استخدامه كبديل موفر أكثر من البيض العادى، وعلى صفحات التواصل الاجتماعى انتشرت طرق استخدام بيض البط فى الأكلات «الحلو والحادق»، وطريقة التخلص من رائحته النفّاذة، عن طريق إضافة بن وفانيليا إليه: «ميزة بيض البط إنه كبير، بس علشان ريحته زفرة مش بيتعمل أومليت، ممكن يدخل فى وصفات الأكل»، حسب ريهام فهمى، التى استخدمته مؤخراً بعد ارتفاع أسعار البيض: «بالصدفة كنت فى سوبر ماركت جنب البيت فى الدقى، ولقيت بيض كبير أرخص من العادى، سألت عليه، وعرفت أنه بيض بط فقلت أدخله فى نص الأكل».

«أم كريم»، بائعة البيض، تعرض كميات محدودة من بيض البط على فرشتها فى سوق عزبة معروف بمنطقة عين شمس: «الناس علشان مش متعودة عليه بتستغربه وبتستغرب حجمه.. علشان مش كل الناس بتستخدمه». نسبة الإقبال على بيض البط لدى «أم كريم» لا تزال محدودة، مقارنة ببيض الدجاج البلدى والأبيض.

الشيف طاهر محمد، يضطر أحياناً إلى استخدام بيض البط فى بعض الوصفات: «بنستخدمه دايماً فى الحلويات بعد ما نزود عليه فانيليا ورشة قهوة علشان تضيع الزفارة، وفى الأكل العادى بنزود الفلفل الأسود، غير كده هو كويس جداً».