مجاز مرسل
وعلمني الهوى فيكي
بإن العمر ما بيتقاسش بالفرحة
ولا بحُبك
ولا الوقت اللي بيه محسوب
وعلمني إن ياما قلوب
كتير علشان تعيش ماتت
وسابت نبضها يدبل
وفاتت حلمها مصلوب
وعلمني الهوى فيكي
بإن الحب
حتى الحب..
فيه غالب وفيه مغلوب
راهنت العمر على بكرة
بدوّر في السؤال على رد
ومالقتش الإجابة في حد
وفكرت الجواب إنتي
وفكرت إن شوقي بجد
أتاري هواكي
محض مجاز
مجازاً
كات بتتلون
بلون طيفك حيطان أوضتي
وكل ما أطل في مراية
أشوف صورتك
بدال صورتي
مجازاً
كات حروف اسمك
بتتحرك على لساني
وأقول لك..
وانسى اجيب سيرتي
مجازاً كنت بقنعني
بإن محبتك غاية
وإن في ضحكتك إنجاز
مجازاً كنت بعتبرك
في لحظة غربتي الصحبة
وساعة كسرتي العكاز
مجازاً
بس عمره ما جاز
وعلمني الهوى فيكي
أحبك
بس ما أحلمشي تكوني لي
وأكون لك
لما تتنازلي وتبقي لي
وتختاري اللقا بكيفك
وتختاري الفراق بمعاد
وإن الالتزام بيننا
أساسه إن إحنا
نبقى بعاد
وإن الأمنيات بتهون
عشان كلمة
مفيش للحب جواكي
في أوقات الغضب
حُرمة
وعلمني الهوى فيكي
حقيقة عشقي للنيكوتين
وتأثيره العظيم فيا
في إن الحب حرية
وإن محبتك إدمان
وأنا عارف نهايته الموت
أكيد لازم هوانا يموت
ما دام مش لاقي فينا مكان
فبكره دوري في حكايتك
وبكره عشقي للدخان
بحبك
حب كل سجين
بيكره
طلة السجان
وعلمني الهوى فيكي
بإن رهاني ع الفكرة
في قلب عنيكي مش مكسب
ومهما راهنت مش هاكسب
ولا هاوصل لنور بكرة
فغلطان قلبي لو صدق
بإن غرام عنيكي
غرام
لان العشق في عيونك
ماهواش عشق في المطلق
ولا يشبه له بالمرة
فخليكي..
يا دوب مافيكي يكفيكي
معاكي الأمنيات
مُرة
يموت فيكي الهوى مسجون
تعيش فيكي الظنون
حرّة
