بـ"برميل ولوح ثلج وشفاط".. "فهد" يحارب حر الصيف بـ"تكييف يدوي"
بـ"برميل ولوح ثلج وشفاط".. "فهد" يحارب حر الصيف بـ"تكييف يدوي"
برميل لونه أزرق بأربع فتحات، لوح ثلج، وشفاط هواء.. أدوات استخدمها فهد عبدالرؤوف، لعمل تكييف يدوي، لمواجهة موجة الحر الشديدة وارتفاع اسعار التكييفات "اللي كل يوم بحال"، الأمر الذي دفعه لنشر فكرته بعد نجاحها على صفحته الشخصية "فيس بوك"، حتى يستفيد غيره معلقاً على صور التكييف بـ"آخر اكتشافاتي"، ليتفاجئ بطلبات عديدة من الكثيرين لشراء "تكييف فهد اللي على قد الإيد".
لم يستغرق "فهد" وقتا طويلا في تصنيع التكييف اليدوي، الذي قرر أن يصنعه بيديه كحل بديل للتكييفات التي ارتفعت أسعارها، ومواجهة حر الصيف بطريقة غير مكلفة: "الموضوع كله بسيط مش محتاج غير شفاط هواء متوفر بمقاسات كتيرة ومع الشفاط برميل ولوح من تلج، جبتهم وحاولت افتح البرميل أربع فتحات وقطعت البرميل من تحت على قد الشفاط، وحطيت لوح التلج جوه البرميل، عشان يدخل الهواء عن طريق الشفاط جوه البرميل فيخرج الهوا الساقع من الفتحات".
حالة من السعادة انتابت الشاب الثلاثيني، بعد نجاح فكرته وإقبال الكثيرين عليه، فيقول: "تكلفة الجهاز مش عالية زي التكييفات العادية والشفاط موجود بأكتر من مقاس، في منه مقاس 8 وده بـ600 جنيه، وفي مقاس 10 بـ750 جنيه، ومتوفر مقاسات أكبر لحد مقاس 20 بسعر 1600 جنيه، وهي دي كل التكلفة اللي كتبتها للناس عشان يعرفوا يعملوه، ومكنش في دماغي أن الناس تطلب تشتريه مني، لأنه مش مجالي خالص، أنا صاحب محل حدادة"، مضيفاً: "أنا حاولت أكتب كل التفاصيل عشان الناس تقدر تعمله بسهولة، لأن أنا مش هدفي إني أبيع، أنا كنت بفيد الناس، لأن الجو حر جداً والمروحة مبقتش تعمل حاجه والتكييفات باقت غالية مش كل الناس تقدر تشتريها".
