خبراء التغذية ينصحون: ابتعدوا عن الكشرى والسمك والمخللات فى رمضان

08:18 م | الثلاثاء 09 مايو 2017

وجبات لا تتناسب فى طبيعتها مع الصيام، مكوناتها تُسبّب العطش وتزيد معاناة الصائم لما تُسببه من إفراط فى الشعور بالاحتياج إلى الماء، خصوصاً مع ساعات الصيام الطويلة فى الحر، بعض هذه الوجبات تحتوى على أملاح زائدة تُسبّب العطش، والآخر يحتوى على مواد حافظة ضارة جداً ولا تفيد الجسم. «كشرى، رنجة، فسيخ، سمك سبايسى، بيبسى، أكلات وعصائر تحتوى على مواد حافظة»، أطعمة ومشروبات «دونت ميكس» مع رمضان، حذّر من تناولها خبراء التغذية، الدكتور محمد صلاح استشارى التغذية العلاجية، يرى أنه لا بد من الابتعاد عن الموالح بشكل كبير طوال الشهر، حيث يمتنع مدمنو الرنجة والفسيخ عن تناولها، خصوصاً فى الساعات المتأخرة من الليل لما تُسبّبه من عطش شديد.

ونصح «صلاح» بالابتعاد عن «التقلية والبصل المحمّر والشطة والخل والتوم والمخللات والتحابيش» عند تناول الأكلة الشعبية الشهيرة «الكشرى»: «لو عايز تاكل كشرى ومصمم على الوجبة، لازم تبعد عن كل الحاجات اللى بتعطّش، والمسقعة السبايسى بلاش منها فى الشهر ده، كل ما كان الأكل هادى وبعيد عن المسبك والموالح كل ما كان أفضل». ونصح الدكتور أحمد رامى رمزى، استشارى التغذية العلاجية، بضرورة الابتعاد عن اللحوم الدسمة لما تُسببه من إمساك وآلام بالقولون والتقليل من السكر لما يُسبّبه من خطورة على البنكرياس: «المفروض نقلل كمية الحلويات اللى هناكلها الشهر ده، قطعتين من الحلويات كفاية جداً، المياه كمان لازم نشربها قبل الأكل بربع ساعة أو بعد الأكل بساعة». وحذّر «رمزى» من الإفراط فى شرب عصائر الليمون والبرتقال، لما تُسبّبه من الإحساس بالعطش: «ياريت نكتر من الخضار السوتيه، ونبعد عن أى دهون، حتى الشوربة نشيل وشها».