الكافيهات ألغت «المنيمم».. لكنها تجبر الزبائن على الدفع: اللى هيقعد راح يطلب.. وبالسعر الجديد

08:08 م | الجمعة 28 أبريل 2017

طريقة جديدة تتبعها «الكافيهات» لتعويض ما فاتها بعد إلغاء تطبيق نظام «المنيمم تشارج»، ويعنى الحد الأدنى للحساب، فبعد حادث قتل شاب بأحد كافيهات مصر الجديدة، وإلغاء نظام «المينمم تشارج» ابتدعوا طريقة جديدة وهى إجبار المترددين على أكل أو شرب معين بوضعهما فى اختيارات «المنيو»، وإلا سيدفعون حق الكرسى الذى يجلسون عليه، وهو الأمر الذى أثار غضب بعض المترددين على الكافيهات: «ده إحنا نقعد على قهوة بلدى بقى وأهو إجبار بإجبار».

زيادة أسعار المشروبات والمأكولات المقدمة أصبحت تعوض الكافيهات عن إلغاء المنيمم، بحسب نوران ماجد، 22 عاماً: «كتير كنت بقعد مع صحابى وكان المنيمم ميتعداش الـ100 جنيه، دلوقتى لما نقعد ممكن نعدى الـ200 جنيه عشان الأسعار زادت، ده غير إن كلنا لازم نشرب أو ناكل».

{long_qoute_1}

«ساعات باتفق اتقابل مع صحابى فى أى كافيه وقاعد مستنيهم ناكل مع بعض.. ييجى الويتر يقولى بس انت لازم تطلب أى حاجة».. قالها خالد حسين، 26 عاماً، الذى عبر عن استيائه بقوله: «إحنا داخلين كافيه أكيد مش هنقوم نجرى»، لكنه مؤخراً بدأ يشعر بالاستغلال، خصوصاً بعد قرار إلغاء المنيمم: «لغوا المنيمم بقوا يخيرونا يا ناكل يا نشرب.. هى هى بس بطريقة تانية.. بيعرفوا يسحبوا مننا الفلوس برضو، وساعات بندفع أكتر لأن الأسعار أساساً غليت لوحدها».

لاحظ «حسين» أن بعض الكافيهات عقب إلغاء المنيمم أصبحت تتبع ذلك الأسلوب الإجبارى، قبل دخول باب الكافيه، الأمر الذى يثير استياء غضب الشاب العشرينى الذى اعتبر أن ذلك الأسلوب لا يمت للذوق بالصلة: «زى ما يكون بيقولولنا امشوا.. بصراحة لو دخلت مكان وحد قالى القعدة بحساب، بامشى، مابحبش أقعد فى مكان يبقوا مركزين معايا أكتر من نفسى».

«إحنا لسه طلبة وفيه ناس من صحابى مش بيبقى معاهم فلوس كتير، والأسعار غالية، فنبقى 6 مثلاً و5 وساعات بنضطر كلنا نقوم نمشى».. بحسب آلاء أحمد: «طب الأول كنا بنقعد وبنضطر عشان المنيمم ونطلب أى حاجة ناكلها.. لكن دلوقت بيلموا المنيمم إجبارى»، ما وضع «آلاء» وأصدقاءها فى مأزق الاتفاق المبدئى قبل الذهاب إلى أى كافيه: «وساعات نتصل الأول بالكافيه نعرف نظامه فى القعدة، لو يناسبنا نروح».

«معظم الكافيهات تحس إنها بقت تبص لجيوبنا الأول».. بحسب «آلاء»، ما جعلها تفضل الجلوس معظم أوقاتها داخل الجامعة أو الجلوس فى كافيهات أقرب إلى المقهى البلدى، نظراً لعدم خضوعها لقوانين وآليات تفرضها على المترددين.