في ذكرى مولده.. مختارات من قصائد "الخال"
في ذكرى مولده.. مختارات من قصائد "الخال"
"مزيج بين الصراحة الشديدة والغموض الجميل، بين الفن والفلسفة، بين غاية التعقيد وقمة البساطة، بين مكر الفلاح وشهامة الصعيدي، بين ثقافة المفكرين وطيبة البسطاء.. هو السهل الممتنع، الذي ظن البعض، وبعض الظن إثم، أن تقليده سهل وتكراره ممكن"، هكذا وصف الكاتب الصحفي محمد توفيق، الشاعر الراحل عبد الرحمن الأبنودي في مقدمة كتاب عنه تحت عنوان "الخال".
وتميز الشاعر الكبير عبد الرحمن الأبنودي بقصائدة العامية واستطاع أن يفرض وجودها على الساحة الشعرية والثقافية، ويعتبر الأبنودي أول شاعر عامية مصري يفوز بجائزة الدولة التقديرية عام 2001.
وألف "الخال" الكثير من الأعمال الشعرية والأدبية أبرزها "السيرة الهلالية" و"جوابات حراقي القط"، وترصد "الوطن" في ذكرى مولده، مقتبسات من 5 قصائد له.
- قصيدة "يامنه"
والله وشبت يا عبد الرُّحمان ..
عجّزت يا واد ؟
مُسْرَعْ؟
ميتى وكيف؟
عاد اللي يعجّز في بلاده
غير اللي يعجز ضيف !!
هلكوك النسوان؟
شفتك مرة في التلفزيون
ومرة .. وروني صورتك في الجورنان
قلت : كبر عبد الرحمان!!
أمال انا على كده مت بقى لي ميت حول!!
والله خايفة يا وليدي القعدة لتطول
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية..
وباين حاحيا كمان وكمان
عشت كتير
عشت لحد ماشفتك عجّزت يا عبد الرحمان
وقالولي قال خَلَّفت
وانت عجوز خلَّفت يا اخوي؟
وبنات..!!؟
أمال كنت بتعمل إيه
طيلة العمر اللي فات؟
دلوقت مافقت؟
وجايبهم دِلْوكْ تعمل بيهم إيه؟
على كلٍّ..
أهي ريحة من ريحتك ع الأرض
يونسُّوا بعض
ماشي يا عبد الرحمان
أهو عشنا وطلنا منك بصة وشمة
دلوك بس ما فكرت ف يامنة وقلت: يا عمة؟
حبيبي انت يا عبد الرحمان
والله حبيبي .. وتتحب
على قد ماسارقاك الغربة
لكن ليك قلب
- "المتهم"
عشب الربيع مهما اندهس
بالقدم
أو انتنى في الريح
بيشب تاني لفوق
يغني للخضره وطعم الألم
حبيبتي وإن يسألوكي
قولى مسافر بعيد
رايح يقابل العيد
على قلعة فوق الجبل
واللا في سجن جديد
في غرفة ضيقة في ساحة
الإعدام
يرمى الرصاص واللا
الخلاص
في خية المشنقة
مشوار بعيد المعنى
عالي الصوت
إذا مارحتوش أموت
وعالمي ينقفل
والشمس تسحب خيوطها وتنسحب في خجل
وسعيد كل ما قربت المواعيد
وهل فجر جديد
سعيد بكل اللى متألمه
كل الألم في الدنيا متعلمه
في زماننا ده ما أخيب اللى
الحزن يفطمه
- "خايف أموت"
خايف أموت من غير ما اشوف تغيير الوشوش
خرج الشتا وهلِّت روايح الصيف
والسجن دلوقتى يرد الكيف
مانتيش غريبة يا بلدي ومانيش ضيف
لو كان بتفهمي الأصول
لتوقفى سير الشموس..
وتعطلي الفصول.
وتنشفي النيل في الضفاف السود
وتدودى العنقود
وتطرشي الرغيف
ما عدتي متمتعة وانتى في ناب الغول
بتندغي الذلة وتجتري الخمول
وتئني تحت الحمول
وتزيفي في القول
وبأي صورة ماعادش شكلك ظريف
- "زمن عبدالحليم"
فينك يا عبد الحليم
فين صوتك اللى كان
فرح وهموم
وكان سما بنجوم
اللى طلع م القلب
عارف يعيش..ويدوم
فينك يا عبد الحليم
فينك
يا احلا من يغنى الفراق
تيجى تغنى زحمة الشهداء
والدم فى فلسطين
وعلى توب العراق
فينك يا عبد الحليم
فينك يا زارع الحلم
بعد الحلم
بعد الحلم
الدنيا.. ريح.. وغيوم
الدنيا ..موت ..وسموم
ولا حد سامع
صرخة المظلوم
ولا انة المهموم
الدنيا منتظرة صوتك
ومحوشالك هم
اكتر من الايام
- "قمر يافا"
لسه ما شبعتش طوافة
ياللى بتطوف من سنين
لسه ما كرهت الليالى ؟
لسه ما شبعتش مشاهدة.. ؟
يا قمر .. حالك .. كحالي..
ضيعونا .. بالمعاهدة
يا قمر .. هدوا قبورنا
واستباحوا اللى ف صدورنا
دمروا قلوبنا ودورنا
حقنا أصبح خرافة
وضعت يا بلدى الأمين
يا قمر .. تصعد في "يافا"
تترمي في "دير ياسين"
