اختفاء طفل بالسيدة.. ووالدته: "اتنين ستات اتخانقوا عليه.. وواحدة خدته"

11:46 ص | السبت 01 أبريل 2017

"ابني مختفي من أسبوعين ومحدش سائل فيّا، رحت قسم الدقي، عشان أبلّغ، قالولي تعالي بلغي بعد 48 ساعة، ولو لقيتيه بعد البلاغ تعالي اعملي تنازل عن المحضر".. بهذه الكلمات، روت السيدة الخمسينية مصابها، في اختفاء ابنها "أيمن حمادة حساب"، التلميذ في الصف الرابع الابتدائي.

تعيش السيدة الخمسينية مع أسرتها في كفر برك الخيام بمحافظة الجيزة، وتقول إن ابنها يذهب للمدرسة كل يوم في الحادية عشر صباحا، ويعود بعد انتهاء اليوم الدراسي، لكنه اختفى منذ 13 مارس الماضي، ولم يعد للمنزل.

لم تترك الأم مكانا إلا وبحثت فيه عن ابنها، ذهبت للمدرسة فقالوا لها إنه لم يحضر، فحررت المحضر رقم 1883، في قسم الدقي، وتأمل في أن تجد الشرطة ابنها.

قالت الأم ودموعها تغرق عينيها: "تاني يوم بعد ما اختفى، افتكرت اني كنت قبلها بيوم في السيدة زينب بصرف دوا ليّا، وكان معايا، وقالي المكان هنا حلو يا ماما وعاوزين نعيش فيه، فقلت يمكن يكون راج يلعب هناك، وفعلا رحت وسألت واحد بيعمل شاي عنه ووريته صورته، قالي انه شافه بيلعب إمبارح مع الولاد هنا، وشاف 2 ستات بيتخانقوا عليه وكل واحدة بتغريه بالأكل والحلوى، فسبّ واحدة وراح مع التانية".

"مبنامش الليل، ومش عارفة أعمل إيه، رحت تاني يوم السيدة وسألت بياع الشاي عنه يمكن يكون شافه، لكنه اختفى". قالت الأم، وزادت: "إحنا غلابة وعلى قد حالنا، لا معانا فلوس نعمل إعلانات عنه ولا عارفين نوصله، أبوه عامل أرزقي على باب الله ونفسنا نلاقيه، واللي يلاقيه يتصل على رقم والده 01066050293".