بالصور| والدة ضحية "قسم الجيزة": "مش هقبل إلا بإعدام الضباط اللي قتلوا ابني"

11:51 ص | الأربعاء 22 مارس 2017

قالت الحاجة سهام والدة "سعد"، ضحية قسم الجيزة، قبل بدء جلسة النطق بالحكم على المتهمين في القضية، وهم معاون قسم الجيزة، نائب المأمور، و4 أمناء شرطة، إنها لن تقبل إلا بحكم "الإعدام" للمتهمين، الذين قتلوا فرحتها بنجلها الوحيد قبل زفافه بشهور، مضيفة: "في حالة صدور حكم غير مرضي لها، سنطعن عليه في محكمة النقض".

وأضافت والدة ضحية قسم الجيزة: "هفضل أحارب في القضية لحد آخر يوم في عمري، اللي راح ده زهرة حياتي كلها، وأبوه مات وراه من حزنه وقهرته عليه، بعد ما حس ان حقه ممكن يضيع لمجرد إن اللي قتله ضابط، أبوه مات وراه وبقيت أنا وبناتي من غير سند وظهر".

وتابعت هبة، شقيقة المتوفى: "المتهمين وعائلتهم تواصلوا معانا كتير وعرضوا دفع مبالغ مالية كبيرة وصلت لـ2 مليون جنيه، لكننا رفضنا أي فلوس، أخويا راح وأبويا وراه ومفيش أي فلوس هتعوضنا عنهم، لكن بكل صراحة من كتر المحاباة اللي أنا شفتها من يوم الواقعة لحد النهارده، فقدت الأمل خالص إن الضباط ممكن ياخدوا حكم، حاسة إنهم ممكن يطلعوا منها، وكأن شيء لم يحدث، وبتصعب عليا ماما لما تقول مش هتنازل عن إعدامهم، بقولها ديما يا أمي إحنا ندعي ياخد أي حكم ولو سنة، حتى عشان منحسش ان أخونا دمه رخيص أوي".

وقال الحاج أحمد عبدالحميد حماد خال المتوفى: "سعد كان شاب محترم والكل يشهد له بالاحترام والأدب، وراح ظلم من غير ما يعمل حاجة، واحنا احتكمنا للقضاء وواثقين في نزاهته وانه هياخد حقنا من الظلمة، كلي اللي بتمناه اننا نرجع بيتنا مجبورين الخاطر، وأشوف أختي بتبتسم بعد أكثر من 4 سنين قضتهم من يوم الحادثة في الحزن والألم، وزاد عليها وفاة جوزها اللي مات من شدة صدمته، بعد جلسة المرافعة وشعوره بالتواطؤ مع المتهمين، واستماعه لمرافعة دفاع المتهمين، اللي كانت مليانة افتراء ومعلومات مغلوطة عن الواقعة".

يذكر أن محكمة جنايات الجيزة، برئاسة المستشار علاء الدين شوقي، ستنطق بالحكم بعد قليل، على معاون مباحث سابق في قسم الجيزة، ونائب المأمور السابق و4 أمناء شرطة سابقين، بتهمة تعذيب المحاسب سعد سعيد حتى الموت.

والمتهمون في القضية هم: "هشام ع" نقيب شرطة ومعاون مباحث قسم الجيزة، و"ياسر ف" (43 عاما)، مقدم شرطة ونائب مأمور قسم الجيزة، و"وائل ع" (37 عاما) أمين شرطة، و"أيمن أ" (29 عاما) أمين شرطة، و"هاني ف" (30 عاما) أمين شرطة، و"أشرف ع" (37 عاما) شرطي.

وكانت النيابة وجّهت للمتهمين، اتهامات بالقبض على "سعد سعيد" محاسب، دون وجه حق، ومارسوا التعذيب عليه داخل قسم شرطة الجيزة حتى الموت، وذلك في العام 2012، واستمرت التحقيقات على مدار 4 سنوات، حتى أحيل المتهمين لمحكمة الجنايات.