جزار يبيع الدهن لـ«الطبخ القرديحى» «الكيلو كان بـ8 جنيه.. بقى بـ20»
جزار يبيع الدهن لـ«الطبخ القرديحى» «الكيلو كان بـ8 جنيه.. بقى بـ20»
وضع دهن اللحم على منضدة أمام جزارته بشارع المغربلين بحى الدرب الأحمر، وعلق لافتة كتب عليها «الكيلو بـ20 جنيه»، ينظر المارة للافتة ويعبرون عن دهشتهم بعبارة «دهن وبـ20 جنيه؟»، بينما ينظرون للحمة بحسرة بعد أن تجاوز سعرها حاجز الـ120 جنيهاً. إبراهيم الصباحى، جزار، برر ارتفاع سعر الدهون بقوله: «إذا كانت اللحمة بـ125 جنيه، طبيعى إن الدهن كمان سعره يرتفع، الناس فاهمة ومش غريبة عليها قصة ارتفاع الأسعار، مفيش حاجة رخيصة دلوقتى حتى الدهون». لا يقترب زبائن «الصباحى» من اللحمة، لكنهم يفاصلون فى ثمن الدهن: «والله الغلابة مش قادرين على سعر الدهن وبيفاصلوا فيه، فيه ناس بتيجى تاخد نص كيلو بـ10 جنيه وفيه ناس بتشترى بـ5 أى حاجة يحلّوا بيها الطبيخ القرديحى وخلاص». يتحسر «الصباحى» على ما أصاب السوق: «لا بيعة ولا شروة، على الصبح كده جات واحدة قالت لى هات باتنين جنيه دهن، اديتها اللى فيه النصيب، الناس تعبانة قوى بسبب ارتفاع الأسعار، المرتبات مابقتش تجيب حاجة». قبل هوجة ارتفاع الأسعار، كان «الصباحى» يبيع الدهن بـ8 جنيهات للكيلو، إلى أن قفز السعر إلى 20 جنيهاً: «نفسى اللحمة ترخص زى زمان، وكل الناس تاكل وتفرح وتعيش».
