تغيير الاسكارفات وصبغ الملابس والتجديد فى الإكسسوارات وسائل شبابية لمحاربة ارتفاع أسعار «الشتوى» هذا العام

09:04 م | السبت 21 يناير 2017

تزامن دخول فصل الشتاء هذا العام مع أزمة ارتفاع سعر الدولار الذى نتج عنه ارتفاع ملحوظ فى أسعار معظم السلع وبالطبع طالت الأزمة أسعار الملابس الشتوية، أما الشباب الذين كانوا يتبارون فى شراء ملابس الشتاء ويحرصون على مواكبة موضة الموسم، فقد أصبحت أسعار الملابس الشتوية مادة خصبة للسخرية فيما بينهم، ولكن آخرين قرروا التعامل مع الأمر الواقع واضطروا لاستخدام بعض التجديدات البسيطة على ملابسهم القديمة. صافيناز عزالدين، 25 سنة، قالت «أسعار لبس الشتا غليت جداً ودى حاجة سيئة لأننا مش عارفين نشترى حاجة.. أنا هجيب لبس جديد بس قليل وهحاول أجدد لبسى القديم بالإكسسوارات وهاستبدل الطرح بالآيس كاب والاسكارفات وكده هحس بتجديد لأنى بافرح بأى حاجة جديدة حتى لو خاتم، وهحاول أحوِّش تمن الجاكيت اللى عاجبنى واللى وصل لـ1400 جنيه أو هخلى خطيبى يجيبهولى هدية». أما مصطفى علوان، فقال «أنا قررت أغيَّر هدومى على بعض يعنى ألبس نفس الجاكيت والبنطلون وأغير القميص مرة، ومرة تانية ألبس الجاكيت والقميص وبنطلون تانى أو نفس القميص والبنطلون وعليهم سويتشيرت أو نفس الطقم بس ألبس عليه مرة سكارف ومرة لأ، وكده هجدد عشان ماملش وهيبان أن عندى لبس كتير».

بينما قال شريف صديق «أنا جبت لبس شتوى جديد فى التخفيضات بس هلبس لبسى القديم عادى ومن غير ما أحاول أجدده لأنى سبته طول فترة الصيف وبقالى كتير مالبستوش فمش هحس بملل منه ولا حاجة». وشاركه فى الرأى أحمد لطفى، حيث قال «أنا جبت لبس جديد فى أول الشتا بس مش كتير وخلاص مش هجيب تانى وهلبس لبسى القديم لأنه لسه حلو ولبس الشتا حلو وأنا بحبه فمابحسش بملل لما ألبس لبسى القديم تانى وأنا بجيب بنطلونات وجزم تمشى مع كل الهدوم، فممكن أبدلهم مع بعض». وقالت بسمة الفيومى، 26 سنة «مش هجيب لبس شتا السنة دى وهجيب جاكيت واحد أسود عشان يليق على كل الهدوم، وممكن أحاول أجدد من لبسى القديم لو فيه هدوم قابلة إنها يتغير لونها ممكن أصبغها أو أغيَّر حاجة كنت بالبس عليها جاكيت طويل ألبس القصير والعكس وممكن أشترى كوفية فيها ألوان كتير تليق على كل اللبس لأن الكوفيات بتغير شكل اللبس ولو فكرت أشترى لبس هجيبه ألوان محايدة زى الرصاصى والأسود والأحمر عشان يليق مع كذا حاجة لكن مش كتير عشان أصلاً الشتا شهرين بس». وقالت مصممة الأزياء وخبيرة الموضة رانيا يوسف، إن أسعار ملابس الشتاء بالفعل زادت بطريقة مبالغ فيها هذا العام، لذلك يجب أن نتحايل على هذا الأمر باللجوء إلى لبس الصيف «أنا دايماً بقول إننا ممكن ندخل اللبس الصيفى فى الشتا زى الجينز والجيب والبنطلون الأسود والبنطلونات عموماً والدريسات كمان وخاصة الجبردين اللى بيمشى صيف وشتا فى الجواكت، وممكن الشيميزات الصيفى تتلبس عادى وعليها جاكيت تقيل ويفضل يكون عند الشباب والبنات جاكيتين واحد أسود وواحد بيج لأنهم بيليقوا على كل اللبس». وأضافت رانيا يوسف « ممكن تجديد اللبس القديم بالاستعانة بالشال لأن أشكال الشالات متنوعة دلوقتى وممكن نلاقيها كروشيه أو تريكو أو فرو وكل واحد بيختار اللى يناسب ذوقه ومقدرته وكمان البنات ممكن لو محجبة تغير الطرحة على نفس الطقم هيساعد كتير فى تغيير شكل الطقم أو لو مش محجبة الإكسسوارات ممكن تساعدها فى تغير اللوك».