ديكورات من البلالين حفلة على «قد الإيد»

09:14 م | الثلاثاء 03 يناير 2017

حضورها فى أى مكان يشع حالة من البهجة، ولمساتها الفنية تضفى جواً مختلفاً على الحفلات التى تنظمها بتكلفة «على قد الإيد»، رضوى فارس، الطالبة فى كلية التربية النوعية قسم تربية فنية، حافظت على مناسبات كـ«أعياد الميلاد، والزواج، والخطوبة، والنجاح»، التى صارت فى ظل الظروف الاقتصادية صعبة: «دلوقتى نقدر نفرح بأى مناسبة جميلة فى حياتنا بـ200 - 300 جنيه بالكتير»، فكل ما تحتاجه الفتاة العشرينية هو مكان متسع فى الشقة، لتحوله إلى قاعة احتفال بلمسات بسيطة.

لم تفكر «رضوى» يوماً فى المكسب من وراء ما تصممه من ديكورات وأشكال فنية رائعة تناسب مختلف الأذواق، فالأمر بالنسبة لها كان مجرد هواية، تنامت يوماً بعد يوم: «أول ما بدأت الموضوع ده كمتطوعة فى جمعية رسالة، كنت ماسكة الورشة الفنية للجمعية، يعنى كنت بعمل لهم الشو اللى بينزلوا فيه، لو فيه عرض ليهم فى الشارع أو حدث كبير بيتكلم عن مشروع خيرى معين، ولحد دلوقتى موجودة معاهم برضه بعمل كده». الهواية، التى بدأت بعمل تطوعى، ثم احترفتها بدراستها للرسم، صارت الآن عملاً بمقابل مادى بسيط: «بدأت أعرف اللى حواليا صحباتى وجيرانى ومعارفى، لو عندهم خطوبة أو أى حفلة أو مناسبة، أنا أقدر أعمل لهم تصميمات وديكور بتكاليف بسيطة جداً، وفى البيت كمان، بدل ما ناس بيضحك عليها، وتروح تدفع دم قلبها فى قاعات واحتفالات بتكاليف كبيرة».

تصميمات «رضوى» تكون حاضرة فى كافة أنواع الاحتفالات، وبأشكال مختلفة: «فى أعياد الميلاد، بيبقى فيه بلالين على شكل ميكى ماوس وبطوط، وفى أعياد الجواز بنرسم قلوب بالبلالين وتكون ألوانها متناسقة مع الشموع والورد، وفى الخطوبة ممكن نعمل تصميمات للكوشة بالبلالين، وحاجات وأشكال كتير، حسب الطلب».