«فكرة باند»: أغانى الزمن الجميل بنكهة شعبية

08:18 م | الاثنين 02 يناير 2017

«إنت ما بينك وبين الحب دنيا.. دنيا ما تطولها ولا حتى فى خيالك»، كلمات اعتدنا سماعها من كوكب الشرق أم كلثوم فى أغنيتها الشهيرة «حب إيه»، لكن هذه المرة يغنيها أعضاء فرقة «فكرة باند»، التى تعيد إحياء أغانى زمن الفن الجميل، لتنقية آذان الشباب من الأغانى الصاخبة التى تقدمها المهرجانات الشعبية. مصطفى حسين، المسئول عن الفرقة، قال إنهم يعيدون توزيع الأغانى القديمة ويمزجونها باللون الشعبى بعيداً عن الصخب الذى تقدمه أغانى المهرجانات، وذلك لإحياء الفن الأصيل الذى غاب وسط «هوجة» الأغانى الجديدة: «الناس بقت محتاجة تنضّف ودنها شوية». تعمل الفرقة منذ 6 شهور، وذاع صيتها بين أوساط الشباب: «الناس حبت اللون بتاع الأغانى بتاعتنا وبقوا يقولولنا نفسنا نسمع فريد الأطرش كمان»، موضحاً أنهم يحاولون صنع «عُربة جديدة» وذلك بالخروج من مقام لمقام والرجوع له فى الوقت نفسه: «عشان مايتقالش علينا بنقلد نجوم زمان وخلاص.. إحنا لينا لون لوحدنا».

فيما اعتبرت فاطمة سيد، من أعضاء الفرقة، أن الأغانى القديمة هى سلطنة الغناء العربى الأصيل التى يعتمدون عليها داخل فرقتهم، بعيداً عن الكلمات التى ليس لها معنى: «أى حد دلوقتى بقى يطلع يغنى كلمتين على موسيقى عالية وكله بيرقص وخلاص.. إحنا عايزين نرجع للشباب الأغانى القديمة بالشكل اللى بيحبوه». قدمت الفرقة خلال الـ6 شهور 3 حفلات، حسب أحمد آدم، مساعد مسئول الفرقة وأحد مغنيها: «إحنا اتعرفنا من ندوة عملناها فى أحد الأندية، ومن ساعتها الجمهور شجعنا ودعمنا عشان ماحسش إننا بنغنى أى حاجة، وإننا لينا هدف واضح»، مشيراً إلى أن تذكرة حفلات الفرقة تتراوح بين 25 و30 جنيهاً: «إحنا 19 واحد وبنعزف على الكمان والجيتار والقانون والعود والأورج، وبنعمل البروفات فى استوديوهات خاصة بينا».