«تسنيم».. «سباحة ومراسلة وصيدلانية» ومرشحة للقب ملكة جمال ذوى الاحتياجات الخاصة

07:20 م | الجمعة 02 ديسمبر 2016

{long_qoute_1}

23سنة عاشتها على الكرسى المتحرك، تعلمت خلالها أن الإنسان لا يمكن الحكم عليه من خلال الشكل والمظهر الخارجى، «الإنسان جوهر وكل واحد مننا عنده مميزات ربنا إداهاله المفروض ينميها ويطور نفسه على هذا الأساس»، كلمات استهلت بها تسنيم حديثها لـ«الوطن» مؤكدة «البداية كانت قبل ولادتى فقد تسبب نقص الأوكسجين فى إصابتى بضعف بالأطراف الأربعة منعتنى من الحركة الطبيعية وألزمتنى الكرسى»، وتابعت: الحمد لله ربنا رزقنى أسرة تفهمت حالتى وتعاملت معها بشكل أكثر من رائع، مفيش حد من أسرتى حسسنى فى يوم إنى عبء، بل بالعكس كانت ماما كل يوم توصلنى المدرسة وتيجى تاخدنى بعد اليوم مايخلص، بابا وجدو كانوا بيجولى المدرسة يساعدونى لو محتاجة أعمل حاجة، وزمان لما راحوا يقدمولى فى مدرسة لغات كان فيه تحفظ على قبولى من قبل إدارة المدرسة بسبب حالتى، وبابا أخدنى أعمل اختبار ذكاء وكان عمرى وقتها 4 سنين ونتيجة الاختبار تخطت سن الـ6 سنين فكان لزاماً على المدرسة أن تقبلنى، وفى الثانوية العامة حصلت على مجموع 99.6%، ودخلت كلية الصيدلة فى جامعة خاصة علشان جامعة القاهرة مافيهاش سبل إتاحة للأشخاص المعاقين، وفى البداية كانت ترافقنى مساعدة خاصة بعد كده، وأضافت: أصحابى كانوا يعدوا عليّا فى البيت ياخدونى معاهم ويرجعونى كل يوم وكنت بخرج معاهم وأتفسح وأعيش حياتى عادى، وقدرت بفضل الله إنى أكون أول مراسلة من ذوى الإعاقة لبرنامج نظرة أمل المذاع على قناة الصحة والجمال اللى بيعرض تجارب الأشخاص المعاقين ونجاحاتهم فى الحياة، وشاركت فى مسابقة ملكة جمال الأشخاص ذوى الاحتياجات الخاصة وكتير بلغونى إنى أقرب واحدة للحصول على اللقب، أما حكايتى مع السباحة فبدأت مع العلاج الطبيعى، لما زهقت من العلاج الدكتور عرض عليّا إنى أكمل علاج طبيعى فى حمام السباحة، وأنا حبيت الموضوع وكان عندى دكتورة فى الجامعة هى كمان مقعدة على كرسى متحرك لما عرفت إنى بمارس السباحة نصحتنى إنى أشارك فى بطولات رياضية، وبالفعل انضميت لفريق السباحة، وحصلت على المركز الثانى على مستوى الجمهورية فى بطولة السباحة، اتعلمت فى حياتى إن كل حاجة حلوة لازم تيجى بتعب وإن المعاناة بتخلق جوانا روح التحدى، وبينى وبين الكرسى حالة ارتباط شديدة لأنى باعتبر إنه كان سبب انطلاقتى وأنه شجعنى على تحدى نفسى وتحدى حالتى وتحدى المجتمع كمان، علشان يغير نظرته للشخص المعاق، ونصيحتى لأى شخص سواء عنده إعاقة أم لا، خلى قدامك هدف واتعب وإوعى تتنازل عنه مهما كانت المشاكل ومهما كان حجم الإحباط، ولازم تحارب الدنيا وتحارب نفسك لو وقفت فى طريق هدفك».