البدري فرغلي: "مصر اللي في جيوبهم دي مش وطني"

01:08 م | السبت 26 نوفمبر 2016

قال البدري فرغلي رئيس النقابة العامة أصحاب المعاشات، إن الخوف بدأ يتسلل للناس ولهم الحق في ذلك، والرموز الوطنية في الوطن كله أصبحت مهددة، مضيفا: "تسمعوا عن حاجة اسمها يناير أو يونيو، ثورتين، أصبحتا في ذمة التاريخ.. و50% من معاشي راحوا في شهر، وبيوتنا كلها أصبحت مقابر للأحياء، لازم نقف على رجلينا من جديد".

جاء ذلك خلال حفل تأبين محمود فودة عضو الأمانة العامة لحزب التحالف الشعبي الاشتراكي بالدقهلية، بحضور الدكتور محمد غنيم، عضو المجلس الاستشاري العلمي لرئيس الجمهورية ورائد زراعة الكلى في الشرق الأوسط، وأعضاء مجلس النواب عن دائرة دكرنس وبني عبيد، وعدد كبير من السياسيين بالمحافظة.

وأضاف فرغلي: "جئت لحضور حفل تكريم وليس تأبين محمود فودة، فأنا اتولدت مرتين مرة في بورسعيد ومرة في دكرنس فأنا تعلمت هنا حروف الكلام".

وتابع: "علموني إن الوطن هو بيتك ومدرستك وعملك والمستشفى اللي بتتعالج فيها، هو ده الوطن اللي تشيل السلاح للدفاع عنه، ولما ملقيش العمل ولا المستشفى ولا ألاقي بيتي يبقي أنا أدافع عن أي وطن، ولما يقولوا مصر، أقول مصر هي قلبي بتجري في عروقي ، ولكن مصر اللي في جيوبهم دي مش مصري، أنا وطني ومصري أنا كمان عاوز أعيش زيكم".

وقال: "عمري أقل من 70 سنة، شاركت في كل معارك الوطن لم أشعر بالهزيمة قط، كل معارك العسكرية شاركت فيها أو عشتها لكن معركة رغيف العيش أنا اتهزمت فيها، هي دي اللي هزمتني وهزتني، إحنا لم نوقع على شروط الهزيمة، مش هايقدورا علينا، كثير من الأحياء والكبار هم الموتى الحقيقين".

ووجه نداء لكل من ساهموا لأصحاب المعاشات بإنشاء نقابة محمود فودة للمعاشات في دكرنس، لكي تدافع عن أصحاب الوطن، قائلا: "إحنا اللي بنيناه وإحنا اللي هاندافع عنه، نحن في وقت عصيب، لم أر هزيمة حتى في 1967، وما أرجوه صعب عليا، مفيش رجال في مصر تخرجنا من الوحل، وليه نبقى قطع وأشلاء ونكن العداء لبعضنا البعض ونترك الديابة تنهش في لحم الناس يتحدثون عن حقوق العمال ويبيعوهم في الأسواق، حتى أتى لنا سوق العبيد الجديد، اللي جاي ينهش في لحمنا ويسموه صندوق النقد الدولي".