مواطنون: إحنا مطحونين.. والحكومة ما حلّتش حاجة

07:56 م | الثلاثاء 01 نوفمبر 2016

شنَّ مواطنون استطلعت «الوطن» آراءهم، أمس، هجوماً لاذعاً على حكومة المهندس شريف إسماعيل، وحمَّلوها المسئولية عن الأزمات الاقتصادية وارتفاع التضخم، وذلك غداة الهجوم العنيف من النواب على أداء الحكومة، ومطالبات البعض بسحب الثقة منها.

{long_qoute_1}

يقول أحمد سعد، 48 عاماً، يعمل فى مجال الأعمال الحرة: «الحكومة ما حلّتش حاجة فى أى أزمة قابلتها وما قدمتش أى حلول، وده ناتج عن عجز بها أو قصور أو عدم تخطيط وغياب الرؤية المستقبلية للبلد».

وتابع «سعد»: «الرئيس السيسى شغال لوحده وبيقعد مع الوزراء مباشرة، وإحنا تعلمنا فى شغلنا إنه فيه تسلسل وظيفى، وإن الكبير يتدخل ويظهر فى الآخر لما اللى تحتيه يعجزوا، لكن الرئيس بيعمل كل حاجة بنفسه، لأن الحكومة اللى تحته عاجزة.

رمضان إبراهيم،52 عاماً، يعمل فى «صيدناوى»، يقول: «أهم أزمة هى زيادة أسعار السلع وعدم سيطرة الحكومة على الأسعار، وبصراحة الشعب فعلا مطحون، ومفيش رقابة على الأسواق بشكل نهائى وبينزلوا حملة واتنين وبعد كده بيختفوا، وترجع الأسعار أسوأ من الأول، وأزمة زى السكر دى بيزل فى المجمعات الاستهلاكية جزء منه يتوزع على الناس وجزء تانى يروح للسوق السوق السوداء.

من جهته، قال «محمد العربى»، 54 عاماً، محامٍ بالاستئناف: «الحكومة أثبتت فشلها فى جميع الأزمات، وهى أصلاً مش حاسة بالشعب وفى مشكلات لم تستطع حلها من زيادة أسعار وتعليم وصحة وأزمة دولار، والشعب مطحون ومفيش حلقة وصل بينا وبين الحكومة، وأنا شايف من أهم الأزمات هى عودة الشرطة لأساليبها القديمة اللى الشعب قام بثورة عشان يغيرها ورجعت بنفس القمع اللى بتقوم بيه، وشايف إن الحكومة كلها لازم يتعاد هيكلتها من جديد، لأنها لا تقدم حلولاً ولا تُدير أزمات ولا تعمل وفق استراتيجية واضحة ولا تقوم بدورها فى الأساس».