سيدة تطلب الخلع من زوجها: "ظبطته مع واحدة في وضع مخل.. وعاوزني اشيش معاه"

03:08 م | الثلاثاء 23 أغسطس 2016

منذ عام، وقفت "شيرين ج" ربة منزل، وطلبت الخلع من زوجها "عبدالحليم م" ميكانيكي أمام محكمة الأسرة في الجيزة، لكنها تنازلت عنها للصلح، وعقب عودتها إلى مسكن الزوجية، ضربها الزوج ضربا مبرحا، وأصابها بكسور أرقدتها في المنزل شهورا، انتقاما منها بعد لجوئها للمحكمة، لتعود وتقف أمام المحكمة مرة أخرى، لطلب الخلع.

تقول الزوجة لمحكمة الأسرة، في الدعوى التي حملت رقم 114 لسنة 2016: "اتنازلت من شهور عن دعوى الخلع، ورجعت مع جوزي البيت، لكنه مجنون، ضربني وعذبني وهددني لو لجأت لمحكمة الأسرة تاني مش هيسيبني في حالي، أنا متنازلة عن كل حقوقي مقابل الخلع منه".

قدمت الزوجة لمحكمة الأسرة، حافظة مستندات تحتوي على صورة من عقد زواجها الشرعي، وصورة من محضر تنازل سابق عن دعوى خلع رفعتها من قبل، وصورة من محضر جلسة الصلح بين الزوجين داخل محكمة الأسرة، وصورة من محضر تعدي بالضرب ضد الزوج، وصورة شهادة طبية من المستشفى تفيد بأن الزوجة تلقت العلاج مدة كبيرة من الكسر، وكدمات نتيجة ضرب مبرح.

حضرت مع الزوجة شقيقتها، وقالت لمكتب الأسرة: "أنا هشهد بالحق، زوجها مفتري وبيضربها من يوم ما اتجوزوا، ولما رجعتله تاني هددها، قالها إنه مش هيسيبها وهيقتلها لو رفعت دعوى خلع تاني".

تروي الزوجة تفاصيل قصتها لـ"الوطن": "أخدت دبلوم تجارة، وكنت شغالة في محل ملابس لحد ما اتجوزت جاري وسبت شغلي، كان عصبي طول الوقت، حاولت أغير من طباعه لكن مفيش فايدة، كملت حياتي معاه من خوفي من كلمة مطلقة لكن مستحملتش".

تكمل الزوجة: "طلب مني أشرب سجاير وشيشة معاه، وكان بيقولي انزلي القهاوي وشوفي الناس كلها بتشرب شيشة وبتدخن سجاير، جربي زي أصحاب المزاج، ولما كنت برفض كان بيتهمني بإني ست نكدية بدور على خراب البيت".

تتابع: "في يوم رحت البيت عشان أخد هدومي، فتحت باب شقتي، وسمعت أصوات من داخل غرفة النوم، وفوجئت بأن معاه واحدة منتقبة في وضع مخجل، صرخت بعلو صوتي عشان الجيران يسمعوا ويشوفوا الفضايح، الست هربت والجيران اتدخلوا بعد ما جوزي ضربني".

أنهت الزوجة حديثها: "لجأت لمحكمة الأسرة، ورفعت دعوى خلع للمرة الثانية، بعد ما فقدت الأمل في حياتي الزوجية من كتر ضربه وإهانته، مش ناوية ارجع البيت".