معدية «محجوب» تراعى ارتفاع الأسعار: «اللى مش معاه.. يركب ببلاش»

09:37 م | الأربعاء 03 أغسطس 2016

إحساس الرضا الذى يسيطر عليه دفعه إلى اتخاذ قرار بأن «المعدية» التى يملكها لن تقتصر على زبون معين، تستقبل من يملك الأجرة ومن لا يملكها، فهى فى خدمة الجميع، والسبب هو ارتفاع الأسعار. هو «محجوب إبراهيم»، صاحب معدية فى المنيل، الذى يقضى النهار كله فى التجديف لتوصيل زبائنه إلى البر الآخر.

يركب المعدية معظم طبقات المجتمع، فهى توفر عليهم عناء قطع الطريق بالسيارة، عم جابر عامل المذبح، يبدى سعادته بسرعتها فى توصيله إلى منزله: «أحلى حاجة إنى مش بحتاج أمشى كتير، هى بتختصر الطريق على طول»، أما إيمان على، ربة منزل، فأكدت أنها تفضل ركوب المعدية عن التاكسى بسبب زحمة المواصلات، بينما تفضلها «أم آمنة» السيدة العجوز، لرخص أجرتها: «بجنيه واحد بتوصلنى لحد البيت»، وهناك من يتخذها وسيلة للفسحة ومنهم جرجس حنا: «كنت خارج من الكنيسة، قلت أركبها أتفسح شوية ودى أول مرة»!

رغم كل الظروف التى تواجهه فإن «محجوب» أكد أن السعر هو آخر ما يركز عليه مع الركاب، خصوصاً فى ظل ارتفاع الأسعار: «صحيح المعدية هى مصدر رزقى الوحيد، بس الناس مش لاقية تاكل، علشان كده اللى بيركب ومش معاه فلوس، بقوله التوصيلة عليا، والمعدية تحت أمر الركاب من الساعة 7 الصبح لغاية 10 بالليل».

رغم المخاطر الكبيرة التى تتعرض لها القوارب الصغيرة فى مياه نهر النيل واحتمال غرقها فى حال زيادة الحمولة، فإن «محجوب» يثق فى متانة قاربه الصغير: «بقالى 15 سنة باشتغل على المركب دى، وأنا ماقدرش أعيش من غير تجديف كل يوم».