لوحة من «بيض النعام»

12:44 ص | الثلاثاء 15 مارس 2016

هواية غريبة من نوعها تعشقها «مها شلبى»، السيدة التى تعمل بإحدى الشركات الكبرى فى مجال إدارة الأعمال، لا يمكن لمن يراها للوهلة الأولى أن يتخيل أن السيدة الأربعينية الواقفة أمامه تقضى أوقات فراغها فى الرسم على «بيض النعام». {left_qoute_1}

عشر سنوات مع الهواية الغريبة، صحيح أنها تحب الرسم منذ نعومة أظافرها، لكن الصدفة وحدها لعبت دورها فى تعريف «مها» بـ«بيض النعام»، كخامة تستخدمها فى الرسم، تحكى عن البداية: «كنت بشتغل فى الاستيراد والتصدير وصاحب الشركة كان عنده مزرعة نعام، وكانوا دايماً بيجيبوا فى الشركة بيض النعام للموظفين، يطبخوه، جات لى الفكرة، لما شفت فوارغ بيض كتير وإنى مش لازم أهدره».

تقرب «مها» الصورة لمن لا يعرف طبيعة بيض النعام: «قشره زى السيراميك بالظبط، بيتحفر عليها بشينيور السيراميك، ويترسم عليها بألوان السيراميك، وقبل الاستخدام بتترج كويس وتتخرم بشينيور وتنزل البياض مع الصفار، طعمه مختلف شوية عن البيض العادى، الدسم والبروتين أكبر والكمية ممكن تكفى عيلة».

رسوم لحيوانات ومشاهد طبيعية ورموز فرعونية، تلقى الأخيرة اهتماماً خاصاً من زبائن أصبحوا يطلبونها بالاسم: «توت عنخ آمون من أكتر الرسوم اللى بتتطلب منى، بعرض فى معارض خاصة، وفيه أصدقاء بيسفروا الشغل بره، فى دول زى كندا بتهتم بالنوع ده من الفن، لكن هنا فى مصر دايماً الناس تستغرب لما تشوف المنتج، ناس كتير ماتعرفش إن بيض النعام ممكن يترسم عليه».

تتراوح أسعار البيضة الواحدة بعد الرسم بين 500 لـ1500 جنيه: «السعر يختلف حسب المنطقة التى تباع بها والجنسيات التى تشترى»، صحيح أن أقصى ما تبيعه فى أكثر الشهور رواجاً 6 بيضات لكنها تظل تؤكد: «الموضوع هواية بعت كتير أو قليل مش مهم».