شهود عيان يروون تفاصيل "مجزرة الكلاب" في الإسكندرية: "اتقتلوا وهما بيحموا بعض"

07:10 م | الاثنين 28 ديسمبر 2015

صب رواد مواقع التواصل الاجتماعي وصفحات جمعيات الرفق بالحيوان، أمس، غضبهم الشديد على محافظ الإسكندرية الجديد المهندس محمد عبدالظاهر، بعد أن تداولوا صورًا لواقعة قتل الكلاب في منطقة الأزاريطة بالإسكندرية، جراء شن المحافظة حملة لقتل الكلاب الضالة بالمنطقة، أسفرت عن قتل عدد كبير منهم.

وتروي سمر عبدالمجيد، أحد سكان الأزاريطة، والشاهدة علي الواقعة وصاحبة الصور المتداولة لـ"الوطن"، تفاصيل الواقعة، قائلة: "إمبارح العصر سمعت صوت ضرب خرطوش جامد ونزلت من البيت وأنا مرعوبة أشوف في إيه اللي بيحصل في الشارع، لقيت راجل ماسك بندقية بيضرب كلاب الشارع بالخرطوش، والناس بتحاول تمنعه والكلاب بتحاول تستخبى جوا جراج وبتحمي بعضها وهو مش بيوقف الضرب".

وأضافت سمر: "بقيت عمالة أشد الراجل وضربته وحاولت أمنعه وقولتله موتني أنا، لكن للأسف دخلت لقيت كلاب جوا الجراج ميتة، رغم محاولة صاحب الجراج أنه يدخل الكلاب عشان يحميها، والناس في الشارع جت تساعدني في الآخر بعد ما ماتت الكلاب، وجابولي شكاير حطيت فيهم الكلاب، وروحت دفنتهم في طريق كارفور".

وعن منفذي الواقعة، قالت سمر: "كان في عربية من المحافظة وأمين شرطة والراجل اللي كان ماسك البندقية ومشيوا بعد كده على طول"، متابعة: "الكلاب دي كانوا مش بيعملوا حاجة وبياكلوا الزبالة في الشارع وفيه اتنين بس هما اللي نجيوا، منهم كلبة حامل"، متسائلة: "أين الرفق بالحيوان كما فعل سيدنا محمد صلى الله عليه وسلم؟".

ويقول الحاج سعد خميس، صاحب الجراج والشاهد على الواقعة، أن أحد منفذي الحملة قتل الكلاب بالخرطوش، ودخل الجراج قتل أحدها، مضيفًا أنه حاول منعه من ارتكاب تلك المذبحة، لكنه قتلها وتركها دون دفنهم.