تامر حسين عن أزمة الهضبة و"روتانا": "دياب يسيب مش يتساب.. ووراه شعب مش جمهور"

03:55 م | الجمعة 06 نوفمبر 2015

علق الشاعر الغنائي تامر حسين، الصديق المقرب للمطرب عمرو دياب، على أزمة "الهضبة" مع شركة "روتانا"، مقدما رأيه باعتباره واحد من جمهور النجم وليس صديقا له.

وقال حسين، في تدوينة عبر صفحته الرسمية على موقع التواصل الاجتماعي "فسبوك"، "عمرو دياب بقى رمز مصري مشرف باجتهاده 25 سنة وكمية أغاني هيتس لا حصر لها، ابتداء من شوقنا وميال لحد الليله وجماله، تروح فرح تروح حفلة تسمع كمية أغاني جامدة ورا بعض على التوالي تبقى بتضرب كف على كف، إن الراجل ده عنده كمية الأغاني الجامدة دي اللي ما بيلحقش يغنيها كلها أساسا، وده بمشاركة أجيال مختلفة من أكبر الشعراء والملحنين والموزعين في الوطن العربي، والراجل ده إضافة لأي مكان أو كيان يروحه بيعليه ويعمل قيمة فنية باسم وتاريخ عمرو دياب، وأعتقد ده فاد الشركة المنتجة كتير جدا خلال الـ10 سنين اللي فاتوا وما زال فايدها مع احترامي لكل مطربينها فوق راسي".

وأضاف "دياب اللي أنا أعرفه وكلنا نعرفه بيسيب مش بيتساب، بالعقل والمنطق مين حاسيب مين، ممكن طفل صغير يجاوب على السؤال ده، وفكرة أنه راجل فنان مصري ورمز دي خط أحمر، طالما الراجل ملتزم ولا يخل بالتزاماته".

وتابع "الشركات المحترمة هي اللي بتقدر النوع ده من النجوم وتواكب أحلامهم وطموحاتهم وتنقلهم في مكانه أعلى، لأنهم مع فنان عالمي ولغة الحوار والخطاب لازم تبقى على قدر وعيهم باسم مصر، وإن مصر دي الريادة اللي كانوا وما زالوا كل نجوم الوطن العربي بيتشهروا فيها، إلى جانب اسم وتاريخ عمرو دياب".

واختتم حسين، تدوينته قائلا "عمرو دياب وراه شعب مش جمهور".

كانت "روتانا" للإنتاج الفني، أعلنت أمس فسخ تعاقدها مع النجم عمرو دياب، بعد تردد أنباء خلال الساعات الماضية عن وجود خلافات بين الهضبة والشركة.