عجوز من أمام لجنة بالمنيا: "مش عارفة هنتخب مين.. أنا جاية علشان السيسي"

11:55 ص | الأحد 18 أكتوبر 2015

حرصت السيدة المسنة رسمية عبد الوهاب، التي لا تجيد القراءة والكتابة، على التوجه في الساعات الأولى من الصباح للإدلاء بصوتها في انتخابات مجلس النواب بدائرة مركز المنيا.

"أنا مش بعرف أقرا ولا أكتب، ومش عارفه هنتخب مين، بس أنا جيت لما سمعت الرئيس السيسي في التلفزيون بيطلب من الشعب المصري إنه ينزل للمشاركة في الانتخابات، وأنا مقدرشي أرفض له طلب، وجيت علشانه"، هكذا أجابت رسمية على سؤال "الوطن" عن سبب حرضها على الحضور، وأضافت رسمية "جميع المرشحين كانوا يتوافدون على منزلي ويطلبون مني أن أعطيهم صوتي، وأنا بنصحهم إنهم يقفوا مع السيسي ويخلوا بالهم من البلد، ولما ينجحوا يخافوا على مصر ويهتموا بمصالح الناس الغلابة".

وتابعت "إحنا كفلاحين عانينا كتير من التهميش وهضم حقوقنا، ومع ذلك بنراعي مستقبل ولادنا والأجيال الجاية، أما احنا مش حانعيش أكثر من اللي عشناه".

وترجع رسميه بذاكرتها الي الماضي، وتقول "وانا طفلة كنت بروح مع أبويا وإخواتي علشان ينتخبوا، وطوال الطريق كان أبويا يكلمنا عن مصر وتاريخها، ويقولي إحنا أحسن شعب على الأرض، وبنحب بعض، وده مش بيظهر غير في أوقات الشدة"، وتضيف "وعندما كان أبنائي يذهبون إلى الجيش كنت بقول لهم خلوا بالكم من البلد واسمعوا كلام اللي أكبر منكم، إحنا ملناش غير مصر، وفي بلاد كتير تسعى إلى خراب مصر، لأننا أحسن منهم، وبقول للرئيس السيسي إحنا معاك وسمعنا كلامك وجينا نتتخب لأنك نور عينينا زي ما احنا نور عينك".