4 مفاتيح لعلاقة ناجحة
4 مفاتيح لعلاقة ناجحة
أمل محمود
1- حافظوا على العلاقة بأنفسكم:
فيه ناس لما بتحب بتدوب فى اللى قدامها وبتنسى نفسها خالص وبتبقى الحياة: هاكل بامية أصله بيحب البامية.. لا، أصله قال لى ماتلبسيش البنطلون ده، هقطع علاقتى بصاحبتى لأنه مش بيحبها، هسمع تامر حسنى أصلها بتحبه أوى، هبطل أضرب بيانو أصلها بتقول لى الموسيقى حرام، المشكلة إن مع الوقت شخصيتنا بتتمسح بأستيكة وبنبقى مسخ وبالتالى اللى قدامنا مابيلاقيش الإنسان أو الإنسانة اللى حبها فى يوم من الأيام لكن بيلاقى نسخة مشوهة منه ماتلزموش..
2- أسسوا شركة:
يمكن يكون وقع الكلمة غريب بس هى فعلاً شركة، بعد ما كل واحد يحافظ على شخصيته من إنها تروح بيبتدى يركز على الجوانب الإيجابية اللى فى نفسه ويشوف هيضيف بيها إيه للشركة اللى بينى وبين الطرف التانى وكمان يبتدى يركز على الجوانب الإيجابية اللى فى شخصية الطرف التانى ويشوف تأثيرها عليه بالطريقة دى بيبقى كل واحد فى العلاقة ضهر وسند للتانى، يبقى موجود وقت ما يحتاجه، يساعده على إنه يكون إنسان أحسن، أشطر، أشيك.
3- لغة الحب:
لغة الحب بتختلف من إنسان للتانى وكل واحد بيستقبل الحب بلغة خاصة به، يعنى ممكن الشىء اللى انت بتعمله علشان تعبر لها به عن حب مايبقاش هو اللغة الأساسية بتاعتها وتبقى يا عينى كأنك بتحكى قصة حياتك بالهندى لواحد صينى.. يعنى بتأذن فى مالطة، وكل واحد مننا عنده لغة أساسية والباقى ثانوى يعنى مايضرش..
وعلشان تعرفوا لغة الحب دى، لازم تتكلموا مع بعض وتعرفوا إيه لغة حب اللى قدامكم ولازم تكتشفوا انتو كمان إيه اللغة اللى انتو بتحسوا من خلالها بالحب وتقولوها مش عيب لكن العيب إن العلاقة تفشل نتيجة جهل اللى قدامنا أو جهلنا.
4- المناقشة لتوضيح الأمور
ودى أهم نقطة فى الليلة كلها، لأن طول ما إحنا ماشيين فى أى علاقة سواء حب، خطوبة، جواز، بتعدى علينا مواقف صغيرة ممكن تضايق واحد فينا، لو طنشنا وماتكلمناش علشان نتحاشى النكد وحوارات الاتنين، النتيجة إن المواقف هتتجمع وبدل ما هى مجرد بمب صغير فى العلاقة لا دى هتتجمع وتعمل قنبلة كبيرة ممكن تنسف العلاقة من أساسها أو على الأقل هتنفجر فيك وتفتكر لك مواقف من إعدادية أو هينفجر فيكى والرجالة مابتفتكرش زينا لكن المجمل إنه هيبقى مش طايقك.. طب ليه؟ ما نتكلم مع بعض ونشرح لبعض ونحلل كل بمبة علشان نخلص منها ونبدأ على ميّه بيضا، وممكن نبدأ الحوار بـ«ممكن تدينى فرصة أشرح لك أنا عملت كده ليه؟» أو «ممكن تشرح لى انت عملت كده ليه؟» الكلام بيحل مشاكل كتيييير أوى.. استغلوه..