بالفيديو| "شارموفرز" في أول حوار: "البوكسر" الانطلاقة الحقيقية للفريق

07:12 م | الخميس 24 سبتمبر 2015

"شارموفرز" ظهروا بالساحة الفنية في وقت قصير، جذبوا العديد من الجمهور باسمهم الغريب وأدائهم والموسيقى المختلفة، حتى أصبحوا من أشهر الفرق الموجودة على الساحة الفنية، حيث ينتظر محبيهم أغانيهم بفارغ الصبر، كما أن حفلاتهم لا تخلو من البهجة والفرح.

وفي حوار خاص مع "الوطن" يتحدث "أحمد بهاء، ومو العرقان" مؤسسي فرقة "شارموفرز" عن بدايتهم حتى طرح الألبوم الجديد.

- كيف كانت البداية؟

أجاب بهاء: بدايتنا كنا بنلعب في فرق مختلفة و"شارموفرز" كان الوقت اللي بنهزر فيه ونلعب مزيكا لحد ما عملنا صفحة بعد ما سجلنا أغنية بالإنجليزي اسمها a chat in the garden وبعدها بفترة أغنية البوكسر، ولما حصل رد فعل كويس جدا، نزلنا بعدها أغنيتين كمان وكل فترة ننزل أغنية وبعدين لاحظنا الصفحة بتكبر جامد أوي، فاشتغلنا بتركيز أكثر لأننا عايزين نعمل حاجة بجد.

- "شارموفرز" من أين جاء هذا الاسم؟

أجاب مو: اخترنا الاسم ده بسبب تهريج بيني وبين بهاء، وناس أصحابنا.

وأضاف بهاء: واحد صاحبنا كمان اسمه عبدالله، جه رسم وش في أوضه مو، وسميناه ساعتها مستر شارموفرز، وعملنا الصفحة بعدها أصلا بالصورة دي على إن الحياة حاجة عشوائية وهزار ومكناش مستنيين من الموضوع حاجة في الوقت اللي كنا بنعمل فيه كدة.

- ما هي كواليس أول حفلة؟

إحنا كنا كاتبين على صفحة الفيس بوك إننا أول ما نوصل 15 ألفا هننزل حفلة والبيج عددها كبر بسرعة جدا لدرجة لما نزلنا الحفلة في الأزهر بارك كانت الصفحة وصلت لنص مليون، والحضور كانوا في حدود 3 ألاف شخص.

- وما عدد الجمهور الآن بالحفلات؟

أجاب بهاء : في حفلات بتبقى 6 ألاف ولما بتبقى فرق مجمعة بتبقى 7 أو 8 ألاف لكن إحنا عايزين الموضوع يوصل لأكثر من كدة إن شاء الله بعد الألبوم كمان.

- لماذا ترك "عز" الفرقة؟

عز كان معانا في فترة كبيرة عملنا أغاني كثيرة مع بعض وهو كان بيلعب في باند تاني "سلالم" قبل ما يلعب معانا بعدين شارموفرز بقى ليه كيان فكان لازم يختار وهو اختار سلالم لأنها فرقته بقالها سنين.

- أنتم من تقومون بالتأليف والتلحين فهل من الممكن التغيير والاستعانة بأخرين؟

أجاب بهاء: مفيش مشكلة إننا نجرب ده قريب بس لسه مش عارف ده إزاي، الموضوع هيبقى مختلف تماما بس أنا معنديش مشكلة نجرب كل حاجة.

- كل أغنية ولها قصة، هل هي مستوحاة من الحياة الشخصية أم من الواقع؟

أجاب مو: يا إما حاجة حصلت لحد فينا أو حاجة حصلت لحد من أصحابنا يا إما حاجة موجودة في الواقع لما بنشوفها بنكتبها بطريقة ساخرة شوية .

- لماذا لا تقدمون أغاني رومانسية؟

أجاب مو: لا بنغني رومانسي بس مش هاتي بوسة.

وأضاف بهاء: في أغنية اسمها "شارموفت" وفي "كوكو نت" بس هي بتبقى بطريقة بضحك مش فيها الآلام أو كدة .

- ما هي أكثر أغنية قريبة إلى قلوبكم؟

أجاب مو: بحب كله لو فيه أغنية مش بحبها مش هلعبها.

أما بهاء: أنا بحب ميكي أوي وبحب بووت في الألبوم الجديد.

- من الذي أنتج فيديو كليب أغنية "5 سنتي" الشهيرة؟

شركة للنظارات شهيرة وكانت نتيجة مسابقة ولسه بيعملوا مسابقة لحاجات في المزيكا، وإحنا لسه عاملين معاهم حاجة تانية هتنزل كمان يومين، حاجة سينجل مش من الألبوم، وأنتوا أول ناس تعرفوا ده.

- ما هي أغنية الفيديو التي سيتم تصويرها من الألبوم الجديد؟

أغنية الألبوم خليها مفاجأة بس نقدر نقول أن العمل الفني اللي معمول على الألبوم له علاقة بالتصوير.

- هل ستكتفون بتصوير أغنية واحدة؟

أجاب بهاء: ممكن أكثر من أغنية.

- ما دور ساري هاني المنتج الموسيقي في الألبوم الجديد؟

انضم لينا "ساري هاني" المنتج الموسيقي في الألبوم الأخير، وهو صاحبنا من زمان ومزيكاتي جامد، بيساعدنا في إنتاج الألبوم وبيلعب معانا المزيكا لايف وله دور كبير في جودة الألبوم.

- هل كنتم تتوقعوا هذا النجاح؟

بهاء: كنت أتوقع أكتر بكتير بس مكنتش أتوقع دلوقتي.

- ما هي حكاية أغنية "نميمة" في الألبوم الجديد؟

احنا بنم طول الوقت واكتشفنا إن قصة النميمة بتضيع وقت كثير أوي لو بطلنا ننم فيه وقت كتير أوي مش هيضيع.

- وأغنية "مش فارقة"؟

"مش فارقة" بتكلم عن الشباب اللي واخذ موضوع الجواز على أعصابه، في ناس كثير عايزة تتجوز أوي وكل ما يجي يتعرف على واحدة تطلع مش كويسة بالنسبة له.

- تحتوي الأغاني على الكثير من الكلمات الغريبة لدى البعض مثل easy أوmama ، فلماذا تتبعون هذا النهج؟

أجاب بهاء: هو كأني بلعب إيقاع، أنا بحب الأصوات دي أوي ومن ساعة ما اتعملت كان ارتجال، زي بالظبط لما بلعب على أله إيقاع بس بلعبها ببوقي زي يا ليل يا عين، ممكن الواحد يقعد ساعتين يقولها بس بيقولها بصوت عالي أو صوت واطي هي نفس القصة كأنك بتسمع أله مزيكا.

- وماذا عن فيلم "قط وفار"؟

احنا اتعرض علينا أفلام كثير لكن إحنا اخترنا الفيلم ده، لأنه طلعنا بشخصيتنا بالإضافة إلى أننا ارتحنا للمخرج تامر محسن.