الأسماك المملحة هدية أهالي «الدلتا» لكل بيت مصري.. «هابي فسيخ»
الأسماك المملحة هدية أهالي «الدلتا» لكل بيت مصري.. «هابي فسيخ»
فسيخ ورنجة وسردين، ثلاثي يقتحم البيوت المصرية مع أول أيام عيد الفطر المبارك، فينتعش صانعوه وبائعوه ومحبوه، وفي محافظات دلتا مصر تحديداً يعتبرونه «موسم الخير»، الذي ينتظرونه كل عام، ويستعدون بكل جودة ودقة لاستقبال الطلبات من كل أماكن الجمهورية.
«السكري»: عيد الفطر من المواسم التقيلة
في مركز بيلا بمحافظة كفر الشيخ، الذي يُعد قلعة إنتاج الفسيخ في مصر، استعد أصحاب محلات بيع الأسماك المملحة ومن بينهم صبري السكري، صاحب الـ70 عاماً، الذي ورث المهنة عن آبائه وأجداده ويعمل بها منذ 60 عاما: «موسم عيد الفطر من المواسم التقيلة اللي بيكون فيها إقبال كبير على شراء الفسيخ والسردين والرنجة، واحنا بننتظر الموسم ده من السنة للسنة، لأنه موسم خير علينا، أنا مسمي المحل فسخاني الشعب لأن الشعب المصري بكل أطيافه بيحب الفسيخ».
وفي شارع الثورة ببيلا يقف إسلام صبري السكري، صاحب الـ34 عاماً، يساعد والده في المحل الخاص بهما، ورغم حصوله على بكالوريوس تجارة، لكنه فضَّل العمل بمهنة والده ليواصل مسيرة الأجداد: «بحب مهنة الفسخانية لأنها مهنة والدي وجدودي، مفكرتش أشتغل بمؤهلي لأني عندي شغلي الخاص بيّا في محل والدي، ومش أنا لوحدي إبراهيم أخويا كمان معاه ليسانس آداب وشغال في نفس المهنة، وأنا بحب الشغل انة، لأنها سهلة ومكسبها حلو الحمد لله، وموسم عيد الفطر بيكون موسم مختلف وكله خير وبركة، لأن الناس بتكون طالعة من رمضان زهقانة من الأكل عشان كده بيكون فيه إقبال على الفسيخ والسردين والرنجة».
يبدأ الإقبال على شراء الفسيخ من آخر يوم في شهر رمضان وحتى ثالث أيام العيد بحسب «السكري»: «الإقبال بيكون من يوم الوقفة لحد ثالث يوم العيد، وبعد الـ6 أيام البيض، لأن بيكون فيه ناس لسه صايمة، ومفيش عندنا إجازات، وشغالين من الساعة 8 صباحاً لحد الساعة 12 صباحاً، ومن زباينا فنانين ورياضيين مشهورين».
«عبدالعاطي»: الفسيخ بياخد من 10 إلى 15 يوم تمليح
يحتل موسم عيد الفطر المركز الثاني بعد موسم شم النسيم، مثلما يحكي السيد عبدالعاطي، صاحب الـ48 عاماً، أحد فسخانية بيلا: «شغال في المهنة دي من وأنا عندي 10 سنين وشربت الصنعة شرب، طول عمر موسم عيد الفطر بيكون موسم مبيعات، لأننا خلال شهر رمضان بنكون في حالة ركود، والشعب المصري هو الوحيد اللي بياكل فسيخ في العيد، وأهم حاجة في الفسيخ يكون البوري بتاعه سمين من أرض طينة، وهو أحسن حاجة لأن الماية النضيفة أهم حاجة في الصنعة، وأنا بحب أملح الفسيخ في البرميل الخشب اللي احنا اتربينا عليه، والفسيخ بياخد من 10 إلى 15 يوم تمليح عشان يكون جاهز على العيد، والأسعار من 150 لحد 300 جنيه».
«الجودة والأمانة» شعار رفعه سعيد عطية، صاحب الـ37 عاماً، أحد أصحاب محال الأسماك المملحة بمركز المحلة الكبرى بمحافظة الغربية: «شغالين في مهنة الفسيخ من سنين لأنها مهنة أهلنا، وأنا وأخويا محمد شغالين مع بعض في محل واحد، واستعدادنا للعيد غير أي استعداد، لأن الإقبال بيكون كبير على الشراء، الناس بتكون طالعة من رمضان نفسها في حاجة حادقة لأن الشهر كله حلويات، وأهم حاجة الجودة والأمانة عشان كده بنشتري سمكنا من كفر الشيخ اللي معروفة بجودة سمكها أو من بورسعيد».
