«الفاشل» لجميع أنواع السمكرة

11:00 ص | الجمعة 18 سبتمبر 2015

عنوان مثير لافت للانتباه، يقابلك أثناء تجولك بمنطقة الخليفة بالقرب من قلعة صلاح الدين، محل صغير خاص بالسمكرة والميكانيكا، تعلوه لافتة «الفاشل»، فقد سماه صاحبه بهذا الاسم الغريب رغبة منه فى تحقيق رواج عبر دعاية مختلفة لم تكلفه شيئاً.

عم فؤاد، صاحب المحل، توفى منذ عام، بينما تقف زوجته فى المحل تتابع شئونه، يبدو على ملامحها الحزن على وفاة أشهر رجل عرفته المنطقة متخصص فى السمكرة بمختلف أنواعها حتى لو كانت نجارة: «ده مش لقب العيلة زى ما ناس كتير فاكرة، ده اسم اختاره زوجى الله يرحمه من 16 سنة عشان يلفت النظر». تبتسم الزوجة وهى تروى المواقف التى تعرضت لها هى وبناتها الأربع بسبب هذا الاسم الذى أصبح مدعاة للسخرية والتندر: «زوجى كان شاطر جداً فى المهنة دى، أشطر واحد فى السمكرة بشهادة الناس كلها، ومع ذلك كانت شهرته (فؤاد الفاشل) نسبة إلى اسم المحل».

محمد جمال، من سكان المنطقة القدامى، وأحد أصدقاء «فؤاد»، أرجع سبب تسمية المحل بهذا الاسم إلى رغبة صاحبه فى تحقيق شهرة بين ورش السمكرة المنتشرة بين المنطقة: «عم فؤاد كان رجل بسيط فى تعليمه، لكنه كان بيفهم قواعد السوق جداً، زيه زى رجال الأعمال الكبار دلوقتى، الاسم المختلف يجذب الناس ويحقق رواجاً لتجارته»، مضيفاً: «الفاشل مكنش اسم مختلف بس، ده كان اسم غير متوقع وغريب، وده عمل سمعة كبيرة للمحل، يعنى الناس تعرف المحل بالاسم وتعرف تخصصه كمان، حتى لو كانوا مش هيتعاملوا معاه».

يبتسم «عم محمد» وهو يروى نوادر المحل الغريب، فدوماً كان اسم المحل مثاراً للحديث مع عم فؤاد، الذى كان يحكى له المواقف الغريبة التى يتعرض لها بسببه: «فيه ناس كانت بتيجى لفؤاد وتطلب منه تغيير اسم المحل، وفيه ناس كانت كل شغلتها إنها تتريق وتسخر منه، وفيه ناس متدينين كانوا بيطلبوا تغيير الاسم باعتباره مش كويس، لكن فؤاد كان بيطنش كل ده وشايف إن الاسم حلو».