اللى أوله «القبض على الوزير».. آخره «بلّغ عن رشوة»

11:25 ص | الخميس 10 سبتمبر 2015

كما يقال فى الأمثال الشعبية «العجل لو وقع تكتر سكاكينه».. فجرت واقعة إلقاء القبض على وزير الزراعة المستقيل، الدكتور صلاح هلال، طاقة وحماس المواطنين لإطلاق حملات على مواقع التواصل بعنوان «بلّغ عن رشوة» لحث الجميع على التصدى للفساد، تحت شعار «محدش فوق القانون».

«لو حد طلب منك رشوة بلّغ عنه على خط الرقابة الإدارية. ماتسكتش عن حقك»، بانرات مختلفة، جميعها يحمل نفس المعنى الذى أكدت عليه مجموعة من نشطاء مواقع التواصل، من بينهم «محمد حافظ» الذى أسعده الدور الرقابى الذى تؤديه أجهزة الدولة حالياً: «أنا لو لقيت حد قدامى بيدفع رشوة أو بياخدها، هاخده على القسم، ولو ماعرفتش هبلّغ، زمن الخوف راح»، ووافقه «محمود الهادى» معلقاً: «هيحصل إيه لما تلتزم بطابور وتمشى محترم، وتخليك فى حالك، وتشتغل بذمة، ليه الرشوة؟ الكبير أخدها واتفضح».

{long_qoute_1}

فى سوهاج، كان نموذج محاربة «الرشوة» ممثلاً فى «محمود اللبان»، فرغم عمله بإحدى شركات القطاع الخاص، فإنه أطلق صفحة إلكترونية لكشف الفساد فى محافظته، مشيراً إلى أن واقعة القبض على وزير الزراعة أعطته دفعة لاستكمال ما بدأه منذ شهور: «بنتصل ونشتكى ونبعت فاكسات، وماسبتش مسئول إلا لما واجهته، ومش هسكت على حقى، لأن فلوس البلد دى حقنا، بياخدوها من ضرايبنا، ومن ضمن الضريبة اللى بندفعها خدمة البلد».

«3 أسابيع هى المهلة التى تتركها هيئة الرقابة الإدارية للمبلغين عن الفساد فى القطاعات الحكومية للنظر فيها».. قالها «أحمد»، مسئول خدمة الشكاوى بالهيئة، مشيراً إلى أن بلاغات الفساد مستمرة عبر موقع الهيئة www.aca.gov.eg، وقال: «بنستقبل الشكاوى طوال 24 ساعة، فى كل القطاعات الحكومية، أما الجيش والشرطة، فملناش رقابة عليهم، وكمان الشركات الخاصة».