بالليزر وصورتك.. تطوُّر صناعة نتائج الحائط في موسم انتعاشها: «راحت على الورق»

07:58 م | السبت 28 ديسمبر 2024

مع قرب حلول عام 2025، تشهد «نتائج الحائط» إقبالاً كبيراً من المواطنين، الذين يحرصون على شراء النتائج، التي تمردت على شكلها المعتاد، وتطورت هذه الصناعة وشملت «الخشب، والأكريليك، والـPVC».

وتحولت المطابع إلى خلايا نحل لطباعة أكبر عدد ممكن من «النتائج»، لتحقيق الاكتفاء اللازم، وتلبية احتياجات الزبائن الذين أصبحوا يختارون شكل النتيجة ونوعها قبل طباعتها، والتي أصبحت إحدى أهم الهدايا ويتم إهداؤها إلى الأصدقاء أو حتى زملاء العمل بشكل عام.

خطوات صناعة النتائج

يحكي الدكتور وائل الخواجة، صاحب مطبعة في مدينة بيلا بمحافظة كفر الشيخ، لـ«الوطن»، عن خطوات صناعة النتائج المصنوعة من «الخشب، والأكريليك، والـPVC، وهو مادة بلاستيكية لها قدرة عالية على عزل الأتربة والحرارة»: «أول حاجة التصميم اللي بيكون على رغبة الزبون، وبعد كده تحضير الألواح الخشب اللي بتيجى من دمياط مخصوص أو الأكريليك الجاهز، والبلوكات اللي فيها التواريخ اللي بتيجي جاهزة ومصنوعة في شركات مصرية متخصصة، وبنبدأ تقطيع الخامات المطلوبة على ماكينة من الليزر، ثم مرحلة التقفيل والتوزيع، والزبون بيستلم شغله في نفس اليوم، وممكن نطبع 500 نتيجة في اليوم الواحد».

يبدأ الإقبال على شراء النتائج كل عام من منتصف شهر نوفمبر وحتى منتصف شهر يناير بحسب «الخواجة»: «الإقبال على شراء النتائج الحديثة كبير دلوقتي، يمكن زمان كانت النتائج ورقية، إنما دلوقتي مع ظهور الخشب، والأكريليك، والـPVC بقت النتيجة عبارة عن قطعة ديكور، وقيمتها أعلى من قيمة الورق، وممكن تتحط في أي مكان في البيت أو المكتب».

«عبده»: الإقبال على شراء النتائج الجديدة بقى مختلف عن زمان

مع بداية شهر نوفمبر الماضي، استعد أحمد عبده، صاحب مطبعة، لموسم طباعة نتائج عام 2025، من خلال تكثيف العمل داخل المطبعة، وتزويدها بالخامات والعمالة اللازمة: «استعددنا من بدري بتجهيز الخشب، والأكريليك، والـPVC، وكمان البلوكات اللي بتتركب في النتيجة، والإقبال على شراء النتائج الجديدة بقى مختلف عن زمان، لأن كان زمان الفئة اللي بتشترى النتائج فئة الناس الكبار إنما دلوقتي بقى فيه شباب بيشتروا النتائج، ويطلبوا الشكل اللي هما عايزينه كمان، سواء هيحتفظ بيها لنفسه أو هيهديها لحد».

تعمل أسرة «عبده» في طباعة النتائج منذ عام 2000 وفقاً له: «جدي السيد عبده، الله يرحمه، بدأ شغل طباعة النتائج سنة 2000، ووقتها كانت عبارة عن ورقة كبيرة مكتوب عليها الأيام والشهور بنهادي بيها الناس، سواء في منشأة حكومية أو الجيران أو الأصحاب أو الأقارب، وبعد كده بدأت طباعة النتائج الورقية اللي فيها بلوك، لحد ما سنة 2019 بدأنا نجدد في شغلنا وطبعنا نتائج جديدة استخدمنا فيها الخشب، والأكريليك، وغيرهما، وكل ده باستخدام ماكينة حفر الليزر، وبقى ليها زبون أكتر من الأول».

أسعار النتائج الحديثة

تتراوح أسعار النتائج الحديثة من 20 إلى 50 جنيهاً وفقاً لـ«عبده»: «الأسعار في متناول الجميع وعلى قد الإيد، يعني زى ما الزبون عايز بنفِّذ، والفئات اللي بتشتري أكبر عدد من النتائج هي الشركات والمؤسسات والشخصيات العامة، وده بيكون على سبيل الدعاية، وأجمل حاجة في النتائج الحديثة إنك ممكن تتطور فيها كل سنة، ممكن تحط صورتك أو صورة ابنك عليها أو صورة أى حد بتحبه وتكتب كمان الكلام اللي انت عايزه واللي بينطبع بالليزر وبيكون أحلى هدية».