"عمروس" المنوفية.. تبرعت بالأرض للحكومة و"لسه مفيش صرف"

عمل جماعى مستمر منذ 20 عاماً، جهود وتبرعات ذاتية لم يدخرها أهالى قرية «عمروس» بالمنوفية أملاً فى حل المعاناة التى يواجهونها، شكاوى ومناشدات عديدة تقدموا بها إلى الحكومة والمسئولين، لكن دون جدوى، لتستمر قريتهم دون صرف صحى، وتستمر معاناتهم مع مخلفات الصرف، والأزمات الناجمة عنها، من أمراض محتملة وانهيارات تلاحق بعض الأبنية وروائح كريهة تزكم الأنوف، فضلاً عن التكاليف العالية لسيارات الكسح المسئولة عن شفط تلك المخلفات. «مياه الصرف ضربت فى الشوارع، والقرية أصبحت فى حاجة ماسة للاهتمام، عايزين زيارة رسمية عاجلة من الحكومة عشان تشوف أحوالنا»، شكوى وجهها علاء عبدالدائم، أحد أهالى قرية عمروس، لإنقاذ أهله وجيرانه من مأساة الصرف الصحى: «بقالنا سنين مفيش مواسير صرف، وكل يومين تيجى عربيات الكسح تاخد من كل بيت مش أقل من 40 جنيه عشان تشفط الصرف اللى فى الطرنش الموجود تحت كل بيت». الرجل الخمسينى أشار إلى أنه تقدم بشكاوى وقع عليها عدد من الأهالى، إلى المجلس المحلى بالمدينة والشركة القابضة لمياه الشرب والصرف الصحى، مضيفاً: «ماسكتناش لحد هنا، إحنا كمان شكونا لإبراهيم محلب، أيام ما كان وزير للإسكان ووعدنا بزيارة، ودلوقتى بقى رئيس وزراء، ولسه ماجاش يشوف حالنا»، مشيراً إلى أنه «فى 2004 صدر قرار بإقامة شبكة صرف صحى للقرية للأهمية القصوى، بس طلبوا مننا نوفر قطعة أرض حوالى 700 متر عشان يحطوا مقر الصرف الصحى»، العرض لم يجد رفضاً من الأهالى الذين سارعوا لتنفيذه: «وافقنا وبقينا ندور على أرض مناسبة ملك حد يتبرع بيها أو نشتريها من صاحبها، وبدأنا نجمع من كل متزوج 300 جنيه عشان نشترى الأرض، لحد ما قدرنا نوفرها وقدمناها لشركة الصرف الصحى فى 2013، لكن ردوا علينا بإن الأرض مش مناسبة لأنها زراعية وأملنا كله راح»، محاولات سكان عمروس لم تتوقف إلى هنا: «بعد فترة اتبرع واحد بتاع خير من الأهالى بأرض يابسة مساحتها 900 متر، وأخدنا موافقة بيها فى 2014، وبرضو مفيش جديد». المهندس محمد عمر، رئيس الجهاز التنفيذى لمياه الشرب والصرف الصحى بالمنوفية، أوضح أنه يوجد 49 قرية بالمنوفية يوجد بها صرف صحى، و120 قرية تحت الدراسة، «عمروس» واحدة منها: «يوجد أولويات للقرى عشان نعمل فيها صرف، حتى لو شروط الأرض سليمة، من حيث عدد السكان اللى فيها ومساحتها، وشغالين فى أكثر من قرية»، مشيراً إلى أن هناك اجتماعاً للمجلس التنفيذى مع المحافظة خلال يومين، لعمل مناقصة وتكليف إحدى الشركات بتنفيذ شبكة الصرف الصحى، وتابع: «الدور على قرية عمروس، وبنشكر الأهالى على مجهوداتهم».