أمير طعيمة عن "التحفظ على أموال أبو تريكة": قدمولنا جريمة واحدة نفذها
أمير طعيمة عن "التحفظ على أموال أبو تريكة": قدمولنا جريمة واحدة نفذها
تضامن الشاعر والكاتب الغنائي أمير طعيمة، مع محمد أبو تريكة لاعب النادي الأهلي ومنتخب مصر السابق، بعد قرار التحفظ على أمواله، بسبب انتمائه لجماعة الإخوان.
وقال طعيمة، في تدوينة له على صفحته الشخصية "فيس بوك"، إن "الخبر ده لو صحيح يبقى عليه العوض ومنه العوض، أبو تريكة قدم للبلد دي كتير ورمز من رموز مصر عبر تاريخها الحديث، وكان سفيرا للبلد دي في كل المحافل الدولية، وبنفتخر بيه وهنفضل نفتخر بيه رغم أنف المشككين، وإذا كان كل رموز النظام السابق اللي عاثوا في البلاد فسادا وحققوا ثرواتهم من دم الناس بيستمتعوا بفلوسهم وهنتحفظ على أموال رمز مصري مخلص تبق يكارثة".
وواصل طعيمة، دفاعه عن اللاعب، "هرجع أقول تاني أبوتريكة لا مسك مولوتوف ولا لجأ لعنف ولا حرض عليه، وإذا كان بالفعل عنده شركات ففلوسه دي حلاله من تعبه ومجهوده وموهبته اللي ربنا أنعم عليه بيها وأسعد كل مصري بغض النظر عن انتمائه بيها لسنين وسنين، ومجرد أنه في وقت من الأوقات كان شايف أن مرسي رئيسه وانتخبه ودعمه في وقت ملايين انتخبوا فيه مرسي ومنهم رموز ليبرالية ده مش معناه انه إرهابي".
وأضاف: "دوروا على المليارات الحرام اللي اتهربت واللي لسه موجودة جوة البلد بدل ما تتشطروا علي أبو تريكة، أو قدمولنا جريمة واحدة قام بيها أو حرض عليها وهنبقى أول ناس نطالب بالتحفظ على أمواله ومحاسبته، اتركوا لنا شيئا من الأمل وأقيموا العدل على الجميع قبل ما تيجي مصيبة وتاخدنا كلنا بجميع طوائفنا وانتمائتنا # كوميديا_سوداء".
