بالصور| أهالي "مجمع المحاكم" يواجهون الباعة الجائلين بـ"خرطوم مياه"
يبدون ضيقهم من مشهد بات معتادًا على ناظرهم، الباعة الجائلون منتشرون بين الشوارع في منطقة مجمع المحاكم بالمنصورة، الأهالي يناشدون المحافظ وسواه من المسؤولين بإزالة إشغالات تخنق حركة شوارعهم تمامًا، مقررين "هنطفشهم".[SecondImage]
"خرطوم مياه".. الحل الذي دافع به أهالي مجمع المحاكم عن منطقتهم، من احتلال الباعة الجائلين أرصفة الشوارع الذين فشلت حملة إشغالات الحي في صدهم وعودتهم مرة أخرى، "بقالنا سنين على الحال ده، وفي كل سنة البياعين بيزيدوا لدرجة إنهم دخلوا على نص الشارع، وبقى اللي يخرج من المنطقة أو يطلع منها مش أقل من ساعة بياخدها، في مسافة متسويش دقتين بالعربية"، قالها ثروت فتحي، أحد سكان مجمع المحاكم، الذي يعاني كغيره من الجيران من وجود عربات الباعة الجائلين بشوارع منطقته، "مش عارفين ولا ندخل ولا نخرج، وكل ما البلدية تيجي وتشيلهم يرجعوا تاني، فملقناش غير إني كل واحد يغرق قدام بيته بخرطوم ميه باليل، عشان ييجوا الصبح يقفوا في الشارع وهو غرقان ويطفشوا".[ThirdImage]
المياه التي يغرق بها الرجل الخمسيني شارعه وخصوصًا أمام منزله، لم يبالِ تعثر أقدامه يوميًا فيها بقدر وجود الباعة الجائلين في منطقته، "يهون عليا أمشي كل يوم في طين وميه كأني ماسورة ضربت ولو كانت مجاري، بس يمشوا البياعين من عندنا، عشان كده بقيت أنزل كل يوم بالليل أرمي ميه وأغرق قدام بيتي عشان محدش يقف عندي، وجيراني كلهم اتفقوا معايا على كده لحد ما نطفشهم بطريقتنا"، محاولات "ثروت" وجيرانه باءت بالفشل، قائلاً: "مفيش فايدة في البياعين، مشيوا من تحت بيوتنا باقوا يقفوا في نص الشارع بعيد عن الميه المتراكمة على الرصيف، والشارع بقى واقف أكتر، ده غير المعاكسات اللي من البياعين لبناتنا، بس إحنا موقفناش عن رش الميه وكل يوم بنرش الشارع وقدام البيوت لحد ما نزهقهم ونعمل بركة وميعرفوش يقفوا يبيعوا بجنيه".