"بلح باللبن".. رحمة ونور على أرواح شهداء 25 يناير بالتجمع الخامس

وقف مجموعة من أهالي التجمع الخامس، ممسكين في أيديهم أكواب "بلح بالبن"، على طريق شارع التسعين، يوزعوها على قائدي السيارات، والمارة "رحمة ونور على روح شهداء ثورة 25 يناير". في لفته إنسانية، تحمل معنى جديد لذكرى ثورة 25 يناير، قرروا الابتعاد عن أي شعارات أو مظاهرات، مستغلين يوم الإجازة لعمل الخير. الوقوف على الطريق الرئيسي، اختاره سامح محمد، صاحب الفكرة، وأحد سكان التجمع الخامس، معتمد على مختلف الأطياف التي تقصد تلك المنطقة، "فكرت أننا نقف على الطريق من بره عشان نوزع على أكبر عدد من الناس، وبقالنا 3 أيام بنحضر للفكرة والسكان رحبوا بالفكرة، وساعدوني بنزولهم بـ20 كباية لبن بالبلح، لتوزيعها -رحمة ونور على روح الشهداء-، ودي أقل حاجة ممكن نقدمها ليهم فدا روحهم في ذكرى 25 يناير". لم يقصد الشاب الثلاثيني من توزيع أكواب البلح باللبن ثوار يناير فقط، إنما اعتبرها صدقة على أرواح شهداء الثورة جميعاً بما فيهم الجيش والشرطة، "فيه رجال شرطة ماتوا في أقسامهم، واتعزبوا، وفيه شباب راحوا غدر بالرصاص، وإحنا بنوزع رحمة ونور على كل شهيد في الثورة من غير أي تفرقة". 6 ساعات، قضاها سامح، وأهالي التجمع الخامس على الطريق، يوزعوا على المارة أكواب البلح باللبن، محتفلين بذكرى الثورة وإحيائها، "مفيش واحد قبلناه ماخدش مننا كوباية البلح، لدرجة أن في ناس ساكنين في التجمع، لما عرفت سبب التوزيع، نزلوا وشاركونا وقدرنا نوزع عدد كبير في يوم عظيم زي ده". وأضاف "هدفنا مع كل كباية بتتوزع الناس تدعي بالرحمة على الشهداء اللي ماتوا، وملناش أي شعارات سياسية ولا تبع أحزاب، إحنا ناس بتحب مصر، وحبينا نعمل صدقة في ذكرى الثورة بدل المظاهرات والتجمعات".