«لو بتحبيه».. مبادرة الجنس اللطيف فى 2015
«لو بتحبيه».. مبادرة الجنس اللطيف فى 2015
لوقت طويل تصدّر الرجال على مواقع التواصل كافة «الهاشتاجات» التى تخاطب الجنس الآخر أو تدور حولهن، لكن يبدو أن الأيام الأولى لعام 2015 تشهد حالة مختلفة، حيث تصدّر الجنس اللطيف المشهد بهاشتاج حول الرجال بعنوان «لو بتحبيه» تنوعت خلاله المشاركات بين الجدية والسخرية، لكن الأكيد أن الذكور لم يدعوا «الهاشتاج» يمر دون مجموعة من التعليقات والاعترافات.
النصائح الجادة غلبت ما سواها، «مصطفى الصفطى» شارك: «لو بتحبيه ماتزعليهوش وماتنكديش عليه، هو أكيد مش هيبقى ناقصك، كفاية الدنيا اللى معانداه.. اقفى جنبه»، أما «دنيا حمدان» فنصحت: «سامحيه لما يزعلك أو يقول كلام وهو متنرفز، والعبى معاه بلاى استيشن»، «طارق» اعترف بأكثر ما يثير توتر الرجال من وجهة نظره: «ردى عليه وقوليله مالك، لما يسألك (مالك)، عشان (مفيش) دى بتوترنا جداً، وبيبقى هاين علينا نبات فى القهوة اللى فى آخر الشارع»، وغرّد «كريم» أيضاً: «لو بتحبيه اشرحى له أى مادة هيسقط فيها لحد ما ينجح، عشان لو سقط هيعيد السنة، ومش هيخطبك يا هبلة».
التعليقات الساخرة انهالت من مغردين، من بينهم «إيمى نور»، التى قالت: «لو بتحبيه ماتثقيش فيه إلا لما ييجى البيت»، أما «البورعى» فاختصر المسافة: «لو بتحبيه اشحتى عليه»، بينما رأت «منى» المسألة من زاوية مختلفة: «لو بتحبيه بطلى تخرجى معاه وماتخليهوش يجيبلك هدايا عشان يحوش بقى وتتجوزوا، بدل ما انتو زهقانين ومزهقينا معاكم»، أما «مصطفى شوقى» فأكد: «لو بتحبيه هاتيله تليفون آى فون 6 الجديد، صدقينى هيحبك أوى».
