الكلب المعجزة.. يشخص انخفاض مستوى السكر بالدم

حالة استغراب سيطرة على طبيب القلب المصري محمود خيري، الشاب الذي يعد دراساته العليا "الماجستير" في الولايات المتحدة الأمريكية الآن، بسبب كلب أسود اللون عثر عليه داخل مصعد المستشفى العريق بولاية مينيسوتا، حيث النظافة والنظام هما الأساس. "مستشفى (مايو كلينك) من أكبر وأهم المستشفيات في الولايات المتحدة، فمكنتش مستوعب إني أشوف كلب طالع في الأسانسير مع واحدة ست، لاقيتني بقول لروحي كلب جوه المستشفي إزاي"، حالة من الاشمئزاز شعر بها محمود، لكنه في الوقت نفسه أراد أن يعرف كيف نجت السيدة بكلبها ودخلت إلى المستشفى، "طبعا أنا قرفت بس كان عندي فضول أعرف الكلاب دي بتعمل إيه، لأنه كان عليه علامه مكتوب عليها (كلب تنبيه لمريض السكر)".[SecondImage] اعتقد محمود، للوهلة الأولى أن الكلب نفسه مريض سكر، "كنت ساذج، وفاكرهم بيعملوا على الكلب اختبارات لكن لما سألت صاحبته فهمت كل حاجة، صاحبته مريضة سكر وبتاخد أنسولين، ولأنها عايشة لوحدها جابت الكلب دا عشان يساعدها في مرضها، الكلب بيقدر يعرف إن نسبة السكر عندها واطية عن طريق شم مواد معينة من جسمها، ومباشرة بيقوم بتنبيهها عشان تاكل حاجة مسكرة، بدل ما تتعب وتدخل في غيبوبة". لم يكد محمود يصدق أن كلبًا بإمكانه أن يشخص انخفاض مستوى السكر بالدم، لكن السيدة الأمريكية عاجلته: "مش بس كده، أنا لو تعبت خالص بيروح يجبلي التليفون اللاسلكي علشان أكلم الطوارئ"، لم يستطع الطبيب الشاب منع نفسه من التفكير في الاستخدامات المصرية للكلاب، بداية من التسلية واللعب وانتهاء بالتعذيب والكي بماء النار: "الموضوع لفت نظري جدًا، وعرفت إن الكلاب دي بتدخل معهد سنتين علشان يدربوها على كل ده".[ThirdImage] "مش بس الكلاب اللي بتموت فطيس عندنا، البني آدمين كمان، عمري ما هانسى عم أحمد الله يرحمه، الراجل اللي عديت عليه في أول شغلي، كان عنده سكر وضغط وقلب وقصور في الكلية، وكان على طول بيحب البسبوسة وسكره عالي، في مره ممرضة رزعتوا حقنة أنسولين بجرعة كبيرة دون قياس نسبة سكر والنتيجة الراجل راح فطيس.. وكلنا نتحمل مسؤوليته زي ناس وحيوانات كتير بتموت فطيس عندنا".