عروس أسوان: «أتمنى الرئيس يحضر فرحي».. ووالداها: ربنا يباركله
عروس أسوان: «أتمنى الرئيس يحضر فرحي».. ووالداها: ربنا يباركله
قال شافعي مدبولي، والد «آلاء»، عروس أسوان التي تكفل الرئيس عبدالفتاح السيسي بجهازها، إنَّه يسكن في غرب أسوان بمنطقة «نجع الحجاب»، وخلال موجة الطقس السيئ التي شهدتها محافظة أسوان منذ بضعة أيام، تضرر المنزل بشكل كبير جراء الأمطار الكثيفة والسيول، مضيفًا: «والله كان فيه حالة خوف وذعر بسبب الأمطار وصوت الرياح، لكن كان خوفي كله على العيال».
والد العروس عن الطقس السيئ: خوفي كله كان على العيال
مدبولي: الرئيس بيحكم 110 ملايين.. ومنح وقتا لابنتي ووقف اتكلم معاها
وأوضح والد عروس أسوان، في تصريحات خاصة لـ«تليفزيون الوطن»: «الرئيس بيحكم 110 ملايين مصري، ومع ذلك منح وقتًا لابنتي ووقف اتكلم معاها، وأي حد بيكلمه بيديله من الوقت بتاعه، وجاء من مصر لأسوان قبل ما يروح الأقصر، ووقته مضغوط، وأشكره على اللي عمله مع بنتي، ومصر كلها ولادة».
العروس: دعيت الرئيس لحضور زفافي.. «قالي كل حاجة هتكون خلصانه قبل المعاد»
وقالت العروس آلاء شافعي، إنَّها مع هطول الأمطار الكثيفة التي شهدتها المحافظة تضرر جهاز زواجها، ولا يتبقى سوى شهرين على إتمام الزواج، مضيفة: «كنت زعلانه لأن الأوضة وقعت على حاجات فرحي وكان فاضل عليه شهرين بس، شوفت الرئيس ودعيته لفرحي وقولتله إني متضررة، وقالي كل حاجة هتكون خلصانة قبل ميعاد فرحك».
شافعي: فرحانة أوي بالحاجات اللي جابهالي الريس
وأوضحت أنَّ الرئيس أخبرها أنَّه لن يستطيع حضور فرحها: «بإذن الله هتحضر معايا الفرح يا ريس، وهو اللي هيحدده إن شاء الله، الرئيس جبر بخاطري وربنا يجبر بخاطره ويبعد عنه أعداء الوطن، وفرحانه أوي بالحاجات اللي جابهالي الرئيس».
فيما أوضحت راجحة عباس، والدة العروس «آلاء»، أنَّها كانت ضمن الأشخاص الذين كانوا محظوظين باستقبال الرئيس السيسي، وتحدث معهم بكل صراحة وشفافية، «متأخرش ربنا يباركله، وعرض عليا يديني مفتاح شقة، وأنا رفضت وطلبت إن المكان يتصلح ومش عايزة أسيب بلدي أو أخرج منها».
واختتمت والدة العروس الأسوانية: «بنشكر مبادرة حياة كريمة بذلوا مجهود جبارـ وتعبناهم إمبارح وقت ما البنات نزلوا واختاروا الحاجة لـ آلاء، بنشكر الرئيس السيسي على كل اللي عمله معانا، ونتمنى إنه يحضر فرح آلاء».
